سربجیت سنگھ اٹھارہ برسوں سے جیل میں ہیں

اسلام آباد میں دفتر خارجہ کے ترجمان نے خبر رساں ادارے رائٹرز کو بتایا کہ سزائے موت پر عمل درآمد عارضی مدت کے لیے ہے۔

ترجمان کا کہنا تھا کہ سربجیت کی قسمت کے بارے میں حکومت کی مختلف وزارتوں کے درمیان رابطے ہو رہے ہیں۔

سربجیت سنگھ کو انیس سو اکانوے میں پاکستان میں جاسوسی اور مختلف بم دھماکوں کے جرم میں موت کی سزا سنائی گئی تھی۔ ان بم دھماکوں میں تقریباً چودہ افراد ہلاک ہوئے تھے۔

سربجیت کا کہنا ہے کہ وہ غلط شناخت کی سزا بھگت رہے ہیں۔

گزشتہ ہفتے سربجیت سنگھ سے ان کے اہل خانہ نے اٹھارہ برسوں میں پہلی بار ملاقات کی۔ ان کے اہل خانہ ملاقات کے لیے خصوصی طور پر پاکستان آئے تھے۔

سربجیت کی سزا پر عمل درآمد مؤخر ہونے کی اطلاع ملتے ہی بھارت میں ان کے رشتہ داروں میں خوشی کی لہر دوڑ گئی۔

سربجیت سنگھ کی بہن دلبیر کور نے کہا: ’مجھے بہت حد تک یقین ہے کہ سربجیت سنگھ کی رہائی میں مزید تاخیر نہیں ہوگی۔‘