ہارون رشید بی بی سی اردو ڈاٹ کام، اسلام آباد

	پنڈال کو چاروں جانب عدلیہ کی آزادی اور ججوں کی بحالی کے نعروں سے سجے بینروں نے بھرا ہوا ہے

سینکڑوں کی تعداد میں ملک کے مختلف علاقوں سے آئے ہوئے وکلاء، سیاسی و سماجی کارکن جمع ہو رہے ہیں۔ ان کی تعداد میں گزرتے وقت کے ساتھ اضافہ ہو رہا ہے۔

ٹولیوں کی شکل میں صوبہ سرحد کے دیر اور میانوالی جیسے علاقوں سے وکلاء اور سیاسی کارکن صدر پرویز مشرف کے خلاف دل کی بھڑاس نکالتے چلے آ رہے ہیں۔ انہوں نے سیاہ پٹیاں اور بینرز اور پلے کارڈز بھی اٹھا رکھے ہیں۔

پریڈ گراونڈ کو تین کنٹینروں سے دو حصوں میں تقسم کیا گیا ہے۔ اس سے کچھ دور وکلاء رہنماؤں کے بیٹھنے اور خطاب کا انتظام بھی ایک دو کنٹینروں پر کیا گیا ہے۔ پنڈال کو چاروں جانب عدلیہ کی آزادی اور ججوں کی بحالی کے نعروں سے سجے بینروں نے بھرا ہوا ہے۔

تھوڑی دور راولپنڈی اسلام آباد یونین آف جرنلسٹس نے بھی وکلاء کے حق میں جیو کے دفاتر کے سامنے وکلاء سے اظہار یکجہتی کے لیے احتجاجی مظاہرہ کیا ہے۔

صحافیوں کی سہولت کے لیے محکمہ اطلاعات نے بھی ایک کیمپ لگایا ہے لیکن وہاں بیٹھنے کا ہی انتظام تھا، کسی فیکس یا فون کی سہولت نہیں تھی۔

پانی کا انتظام حکومت نے تو ٹینکروں کے ذریعے کیا ہے لیکن ہر آنے والا اپنے ساتھ بھی پانی کی ایک آدھ بوتل ضرور لایا ہے۔ اس کے علاوہ کھانے پینے کی اشیاء اور جوس کے سٹال بھی لگائے گئے ہیں جہاں قیمتاً یہ اشیاء خریدی جاسکتی ہیں۔

مرد و زن کی ضروریات کو مدنظر رکھ کر عارضی بیت الخلاء بھی تعمیر کیے گئے ہیں۔ ان کی موجودگی کی اطلاع سائن بورڈز سے کی گئی ہے۔

ماضی کے احتجاج کی طرح اس مرتبہ بھی میڈیا کی شاید توجہ حاصل کرنے کے لیے انوکھے قسم کے احتجاج بھی دیکھے جاسکتے تھے۔ کوئی قمیض اتار کر تو کوئی زنجیریں پہن کر اپنی مشکلات سے عوام کو آگاہ کر رہا تھا۔

ماضی کے احتجاج کی طرح اس مرتبہ بھی میڈیا کی شاید توجہ حاصل کرنے کے لیے انوکھے قسم کے احتجاج بھی دیکھے جاسکتے تھے۔ کوئی قمیض اتار کر تو کوئی زنجیریں پہن کر اپنی مشکلات سے عوام کو آگاہ کر رہا تھا۔

وکلاء کا احتجاج اسلام آباد تک تو پہنچ گیا۔ اب آگے کیا ہوگا سب کی نظریں اس بات پر ہیں۔ کیا یہ وکلاء کا آخری تیر بھی جلد بازی میں چلا دیا گیا یا اس کے بعد بھی کوئی پتہ اعتزاز احسن نے چھپا رکھا ہے۔ اس بات کا اعلان وہ آج خطاب میں شاید کر دیں۔ ورنہ لوگ اس لانگ مارچ کی افادیت کے بارے میں آئندہ چند روز میں سوالات ضرور اٹھائیں گے۔