ذوالفقار علی بی بی سی اردو ڈاٹ کام، مظفرآباد

	مظفرآباد میں وکلاء اور سول سوسائٹی کا عدلیہ کی بحالی اور صدر مشرف کے خلاف احتجاجی مظاہرہ

وکلاء کے لیے قافلے میں شامل گاڑیوں پر سیاں جھنڈیاں لہرائی گئی ہیں اور بینرز آویزاں ہیں۔ ان بینرز پر عدلیہ کی بحالی کے حق میں اور پرویز مشرف کے خلاف نعرے درج تھے۔

اس قافلے کی قیادت کشمیر کی بار کونسل کے وائس چیرمین چوہدری ابراہیم ضیاء ایڈووکیٹ کر رہے ہیں۔ انہوں نے کہا کہ آمریت کے ادوار میں عمومی طور پر ادارے تباہ کیے گئے اور خاص طور پر سب سے زیادہ نشانہ عدلیہ کو بنایا گیا۔

’آزاد اور خودمختار عدلیہ و آئین کی بحالی، قانون کی بالادستی اور ملک کو بچانے کے لیے پاکستان کے وکلاء کی جدوجہد میں کشمیر کے وکلاء ان کے ساتھ ہیں۔‘

وکلاء کی اسلام آباد روانگی سے قبل مظفرآباد میں وکلاء اور سول سوسائٹی نے پاکستان کی عدلیہ کی بحالی اور صدر پرویز مشرف کے خلاف احتجاجی مظاہرہ کیا۔

مظفرآباد کے علاوہ پاکستان کے زیر انتظام کشمیر کے دیگر سات اضلاع سے بھی وکلاء پاکستان کے وکلاء کی لانگ مارچ میں شرکت کے لیے اسلام آباد جا رہے ہیں جبکہ کئی وکلاء اس لانگ مارچ میں شرکت کے لیے پہلے ہی لاہور پہنچ چکے ہیں۔