رفاقت علی بی بی سی اردو ڈاٹ کام، اسلام آباد

	چیف جسٹس اب چودہ جولائی کو ایک مرتبہ پھر لاہور کا دورہ کریں گے

چیف جسٹس افتخار محمد چودھری کے وکیل طارق محمود نے بی بی سی کو بتایا کہ چیف جسٹس نے سندھ اور بلوچستان میں بارشوں کی تباہ کاری اور بڑی تعداد میں انسانی جانوں کے ضیاع کی وجہ سےاپنا پروگرام منسوخ کیا ہے۔

نومارچ کو عملی طور پر معطل کیے جانےکے بعد چیف جسٹس افتخار محمد چودھری ابھی تک راولپنڈی، سکھر، حیدرآباد، پشاور، لاہور، ایبٹ آباد، فیصل آباد اور ملتان میں وکلاء کی تقاریب میں شرکت کر چکے ہیں۔

چیف جسٹس بارہ مئی کو وکلاء کی دعوت پر کراچی گئے تھے لیکن ان کو ائر پورٹ سے باہر نہیں نکلنے دیاگیا تھا۔

چیف جسٹس اب چودہ جولائی کو ایک مرتبہ پھر لاہور کا دورہ کریں گے۔ اس مرتبہ وہ لاہور بار ایسوسی ایشن کی دعوت پر جا رہے ہیں جبکہ پانچ مئی کو وہ لاہور ہائی کورٹ بار ایسوسی ایشن کی دعوت پر بذریعہ سڑک لاہور گئے تھے جب لاکھوں لوگوں نے ان کا استقبال کیا تھا۔

چیف جسٹس چودہ جولائی کو بذریعہ ہوائی جہاز لاہور پہنچیں گے اور ائر پورٹ سے جلوس کے ساتھ مال روڈ سے گزرتے ہوئے ایوان عدل پہنچیں گے۔

چیف جسٹس اکیس جولائی کو بذریعہ ٹرین کوئٹہ جائیں گے۔ ان کے وکلاء غور کر رہے ہیں کہ چیف جسٹس کوٹری تک ٹرین کے ذریعے سفر کریں اور وہاں سے لاڑکانہ میں وکلاء دعوت میں شرکت کرنے کے بعد بذریعہ سڑک کوئٹہ روانہ ہو جائیں۔