رفعت اللہ اورکزئی بی بی سی اردو ڈاٹ کام، پشاور

	پولیس اور مسلح افراد کے درمیان تقریباً ایک گھنٹے تک بھاری ہتھیاروں سے فائرنگ کا سلسلہ جاری رہا

نوشہرہ سے ملنے والی اطلاعات میں پولیس کے مطابق یہ واقعہ جمعرات کی صبح بدرشی گاؤں میں پیش آیا۔

نوشہرہ کے ضلعی پولیس افیسر یامین خان نے بی بی سی کو بتایا کہ چند مسلح افراد ایک گاڑی میں جا رہے تھے کہ نوشہرہ کینٹ کے علاقے میں سڑک کے کنارے کھڑے پولیس اہلکاروں نے گاڑی کو روکنے کا اشارہ کیا۔ تاہم گاڑی نہیں روکی جس پر پولیس نے گاڑی کا پیچھا کیا جبکہ مسلح افراد نے بدرشی گاؤں جا کر ایک مسجد کے ساتھ واقع گھر میں پناہ لے لی ۔

عینی شاہدین کا کہنا ہے کہ پولیس اور مسلح افراد کے درمیان تقریباً ایک گھنٹے تک بھاری ہتھیاروں سے فائرنگ کا سلسلہ جاری رہا جس میں دو پولیس اہلکاروں سمیت چار افراد زخمی ہوگئے۔ تاہم بعد میں مسلح افراد فرار ہونے میں کامیاب ہوئے۔ پولیس نے سید حسن نامی ایک مسلح شخص کو زخمی حالت میں گرفتار کرلیا ہے۔

ادھر قبائلی علاقے باجوڑ ایجنسی میں حکام کا کہنا ہے کہ حساس ادارے کے ساتھ کام کرنے والے ایک لیوی اہلکار کی لاش ملی ہے جنہیں گولیاں مار کر قتل کیا گیا ہے۔

باجوڑ ایجنسی کے اسسٹنٹ پولیٹکل ایجنٹ محمد جمیل نےبی بی سی کو بتایا کہ گزشتہ روز نامعلوم مسلح افراد نے لیوی اہلکار کو ماموند تحصیل کے علاقے لغڑئی سے اغواء کیا تھا۔ مقتول باجوڑ ایجنسی میں حساس ادارے کے اہلکاروں کے ساتھ کام کرتا تھا۔

واضح رہے کہ گزشتہ روز باجوڑ ایجنسی کے علاقے نواگئی میں سکیورٹی اہلکاروں نے ایک طالب کو فائرنگ کرکے ہلاک جبکہ تین کو زخمی کیا تھا۔ تحریک طالبان پاکستان نے اس واقعہ پر سخت غم و غصے کا اظہار کرتے ہوئے اس ہلاکت کا بدلہ لینے کا اعلان کیا تھا۔