رفعت اللہ اورکزئی بی بی سی اردو ڈاٹ کام، پشاور

	مہمند ایجنسی میں مقامی طالبان اور مسلح گروہوں کے مابین کئی بار جھڑپیں ہوچکی ہیں جس میں اب تک درجنوں افراد ہلاک ہوچکے ہیں

مہمند ایجنسی سے ملنے والی اطلاعات میں سرکاری ذرائع کے مطابق یہ واقعہ سنیچر کی شام ورسک ڈیم کے قریب واقع مچنی کے علاقہ میں پیش آیا۔ مقامی ذرائع کے مطابق کچھ روز قبل عسکریت پسندوں کے ایک گروپ نے مچنی گاؤں میں ایک اور مسلح گروہ کے غفار نامی شخص کو مبینہ طورپر اغواء کیا تھا جس کے بعد دونوں گروہوں کے مابین شدید کشیدگی چلی آرہی تھی۔

عینی شاہدین کے مطابق جمعہ کی شام کے وقت مقامی طالبان کے کچھ جنگجو مچنی گاؤں میں ایک دعوت میں شرکت کر کے واپس جا رہے تھے کہ مخالف مسلح گروہ نے ان پر اندھا دھند فائرنگ کردی جس سے دونوں کے مابین شدید لڑائی شروع ہوگئی۔

عینی شاہدین کا کہنا ہے کہ فریقین نے ایک دوسرے پر بھاری اور خودکار ہتھیاروں سے حملے کیے جس میں سات افراد ہلاک اور دو زخمی ہوگئے۔ سرکاری ذرائع کے مطابق ہلاک ہونے والوں میں ایک خاتون کے علاوہ تین طالبان جنگجو بھی شامل ہیں۔

ایک قبائلی ملک نے بی بی سی کو بتایا کہ مبینہ مقامی طالبان نے اس گھر پر قبضہ کرلیا ہے جہاں سے مسلح افراد نے ان پر حملہ کیا تھا۔ مقامی لوگوں کا کہنا ہے کہ مسلح گروہوں کے مابین فائرنگ کا سلسلہ تقریباً چار گھنٹے تک جاری رہا۔
یہ بھی اطلاعات ہیں کہ ایک مقامی قبائلی جرگہ نے فریقین کے مابین عارضی فائر بندی کرا دی ہے جس کے بعد علاقے میں فائرنگ کا سلسلہ بند ہوگیا ہے۔

واضح رہے کہ مہمند ایجنسی میں مقامی طالبان اور مسلح گروہوں کے مابین کئی بار جھڑپیں ہوچکی ہیں جس میں اب تک درجنوں افراد ہلاک ہوچکے ہیں۔