رفعت اللہ اورکزئی بی بی سی اردو ڈاٹ کام، پشاور

	سرکاری ذرائع کے مطابق ہلاک ہونے والے افراد کا تعلق مقامی طالبان تنظیم سے بتایا جاتا ہے تاہم آزاد ذرائع سے اس کی تصدیق نہیں ہوسکی۔

یہ واقعہ پیر کی شام مہمند ایجنسی کے صدر مقام غلنئی سے چند کلومیٹر دور نقی چیک پوسٹ پر پیش آیا۔

ایک سرکاری اہلکار نے نام ظاہر نہ کرنے کی شرط پر بی بی سی کو بتایا کہ سکیورٹی فورسز نے ایک گاڑی میں سوار کچھ مشکوک مسلح افراد کو نقی چیک پوسٹ پر روکا اور ان کی گاڑی کی تلاشی لینے کی کوشش کی لیکن مسلح افراد نے تلاشی دینے سے انکار کیا جس پر فائرنگ کا تبادلہ ہو گیا۔

اہلکار کے مطابق مسلح افراد دستی بموں اور دیگر خودکاروں سے لیس تھے۔
مقامی لوگوں نے بتایا کہ سکیورٹی فورسز نے گاڑی پر راکٹ حملہ کیا جس سے اس میں آگ لگ گئی اور گاڑی میں سوار تمام پانچ افراد موقع پر ہلاک ہوگئے۔ انہوں نے کہا کہ فائرنگ میں کوئی سکیورٹی اہلکار ہلاک یا زخمی نہیں ہوا۔

سرکاری ذرائع کے مطابق ہلاک ہونے والے افراد کا تعلق مقامی طالبان تنظیم سے بتایا جاتا ہے تاہم آزاد ذرائع سے اس کی تصدیق نہیں ہوسکی۔ بعض ذرائع نے مرنے والے افراد کا تعلق باجوڑ ایجنسی سے بتایا ہے۔

عینی شاہدین کا کہنا ہے کہ اس واقعہ کے بعد علاقے میں سکیورٹی سخت کردی گئی ہے۔ واضح رہے کہ مہمند ایجنسی میں کچھ ماہ سے امن و امان کی صورتحال انتہائی خراب رہی ہے۔ مقامی لوگوں کے مطابق علاقے میں عسکریت پسندوں کے اثر رسوخ میں بھی اضافے کی اطلاعات ہیں۔