رفعت اللہ اورکزئی بی بی سی اردو ڈاٹ کام، پشاور

	کامل مشہدی پشاور میں متعدد اخبارات میں کام کرچکے ہیں۔

تھانہ یکہ توت کے مطابق نجی ٹی وی چینل نیوز ون سے وابستہ مقامی صحافی سید کامل مشہدی اتوار کی شام موٹر سائیکل پر دفتر سے گھر جارہے تھے کہ ٹیڈی گیٹ کے قریب نامعلوم افراد نے ان پرفائرنگ کر دی جس سے وہ شدید زخمی ہوگئے۔

واقعہ کے بعد انہیں فوری طورپر ہپستال پہنچایا گیا جہاں وہ زخموں کی تاب نہ لا کر چل بسے۔ پولیس ذرائع کے مطابق مقتول کو سر میں پستول کی ایک گولی لگی ہے جس سے وہ ہلاک ہوئے۔

مقتول کے قریبی ذرائع نے واقعہ کو خاندانی تنازعہ بتایا ہے۔ پولیس نے مقدمہ درج کر کےواقعہ کی تفتیش شروع کردی ہے۔

پینتالیس سالہ کامل مشہدی پشاور سے شائع ہونے والے متعدد مقامی اخبارات میں کام کرچکے ہیں۔

مقتول کے ساتھ دفتر میں کام کرنے والے ایک اور مقامی صحافی سیف الاسلام سیفی نے بتایا کہ مقتول نے سارا دن پشاور میں بے نظیر بھٹو کے سوئم کے حوالے سے منعقدہ تقریبات کی کوریج کی تھی اور رپورٹ بنانے کے بعد چھٹی کی۔

دریں اثناء پشاور پریس کلب کے نو منتخب صدر ایم ریاض نے سید کامل شہدی کے قتل کی سخت الفاظ میں مذمت کی ہے اور حکومت سے مطالبہ کیا کہ مرحوم کے قاتلوں کو فوری طورگرفتار کرکے واقعہ کی اعلیٰ سطح پر تحقیقات کی جائے۔