عبدالحئی کاکڑ بی بی سی اردو ڈاٹ کام، پشاور

	علاقے میں خواتین کے قتل کی واردات میں اضافہ دیکھنے میں آیا ہے

مہمند ایجنسی کے اسسٹنٹ پولیٹکل ایجنٹ سید احمد شاہ نے بی بی سی کو بتایا کہ تحصیل صافی کے بحاوتہ علاقہ میں واقع سول ڈسپنسری میں تعینات دائی کو جمعرات اور جمعہ کی درمیانی شب کو بعض نامعلوم مسلح افراد نےگولیاں مار کر قتل کر دیا ہے۔

ان کے مطابق خاتون کے سر اور جسم کے بائیں حصے میں گولیاں ماری گئی ہیں۔ ان کے بقول ضلع مردان سے تعلق رکھنے والی خاتون گزشتہ ایک سال سے بحاوتہ کے سول ڈسپنسری میں بطور دایہ تعینات تھیں۔انہوں نے مزید بتایا کہ مبینہ قاتلوں کے بارے میں کچھ کہنا قبل ازوقت ہوگا۔

مہمند ایجنسی میں گزشتہ کچھ عرصے کے دوران طالبان کی سرگرمیوں میں مبینہ اضافہ کے بعد خواتین کے قتل کیے جانے کے واقعات میں اضافہ دیکھنے میں آیا ہے۔ اس سے قبل سکول کی ایک استانی کو مارا گیا تھا جبکہ گزشتہ سال ستمبر میں مبینہ طور پر’جسم فروشی’ میں ملوث ہونے کے الزام میں ایک خاتون کا سر قلم کر دیا گیا تھا۔تاہم ان واقعات کی ذمہ داری کسی نےبھی قبول نہیں کی تھی۔

دو اپریل کو بھی مقامی طالبان نے مہمند ایجنسی کے بائیزئی کے علاقہ میں گھر سے بھاگ جانے والے ایک جوڑے کو مبینہ طور پر’زنا’ میں ملوث ہونے کے الزام میں سنگسار کیے جانے کی ذمہ داری قبول کی تھی۔