شہزاد ملک بی بی سی اردو ڈاٹ کام، اسلام آباد

	شیخ رشید احمد نے کہا کہ وہ پاکستان مسلم لیگ قاف کی نائب صدارت سے مستعفی ہوگئے ہیں

اتوار کے روز راولپنڈی میں لال حویلی میں ایک پریس کانفرنس سے خطاب کرتے ہوئے شیخ رشید احمد نے کہا کہ وہ پاکستان مسلم لیگ قاف کی نائب صدارت سے مستعفی ہوگئے ہیں اور انہوں نے اپنا استعفی جماعت کے صدر چوہدری شجاعت حسین کو بھجوا دیا ہے۔

انہوں نے کہا کہ وہ پاکستان مسلم لیگ میں رہتے ہوئے اپنا کردار ادا کرنا چاہتے
تھے لیکن انہیں حیلوں بہانے سے ایسا نہیں کرنے دیا گیا جس کی وجہ سے انہیں خاصا نقصان اُٹھانا پڑا۔

شیخ رشید احمد حالیہ انتخابات میں وہ راولپنڈی سے قومی اسمبلی کے دو حلقوں سے پاکستان مسلم لیگ قاف کے اُمیدوار تھے اور دونوں حلقوں سے نہ صرف انہیں شکست ہوئی بلکہ اُن کی ضمانتیں بھی ضبط ہوگئیں

کاغذات نامزدگی واپس لینے کی وجہ بتاتے ہوئے انہوں نے کہا کہ سپریم کورٹ بار ایسوسی ایشن کے صدر چوہدری اعتزاز احسن نے جو راولپنڈی کے اسی حلقے سے ضمنی انتخابات میں حصہ لینا چاہتے تھے، اپنے کاغذات نامزدگی واپس لے لیے تھے۔

شیخ رشید احمد نے کہا کہ اُن کی جماعت ورکر کلاس اورمعاشرے کے محروم طبقوں کے افراد پر مشتمل ہوگی اور اُنہیں کوئی بیرونی امداد نہیں آئے گی۔

ایک سوال کے جواب میں سابق وفاقی وزیر نے کہا کہ موجودہ حکمراں اتحاد نے قومی مسائل کو پس پُشت ڈال دیا ہے جس نےعوام کو مایوس کیا ہے اور یہ حکمراں اتحاد زیادہ دیر تک چلتا دکھائی نہیں دیتا۔

سابق وفاقی وزیر نے کہا کہ معزول چیف جسٹس افتخار محمد چوہدری کی بحالی کے حوالے سے موجودہ حکمراں اتحاد لیت ولعل سے کام لے رہا ہے۔

واضح رہے کہ شیخ رشید احمد نے کچھ عرصہ قبل کہا تھا کہ اٹھارہ فروری سنہ دو ہزار سات کو ہونے والے انتخابات اُن کی زندگی کا آخری الیکشن ہوگا تاہم انہوں نے کہا کہ وہ آئندہ انتخابات میں بھی حصہ لیتے رہیں گے۔

چھ مرتبہ راولپنڈی سے قومی اسمبلی کے رکن منتخب ہونے والے شیخ رشید احمد صدر جنرل ریٹائرڈ پرویز مشرف کے قریبی ساتھی سمجھے جاتے ہیں اور حالیہ انتخابات میں وہ راولپنڈی سے قومی اسمبلی کے دو حلقوں سے پاکستان مسلم لیگ قاف کے اُمیدوار تھے اور دونوں حلقوں سے نہ صرف انہیں شکست ہوئی بلکہ اُن کی ضمانتیں بھی ضبط ہوگئیں۔