علی سلمان، عباد الحق بی بی سی اردو ڈاٹ کام، لاہور

	لاہور ہائی کورٹ کے الیکشن ٹریبونل نے نواز شریف اور شہباز شریف کی اہلیت پر فیصلہ محفوظ کر لیا

انہوں نے کہا کہ ان درخواستوں کا کوئی اخلاقی، قانونی اور آئینی جواز نہیں بنتا۔ وہ ماڈل ٹاؤن لاہور میں مسلم لیگ نون کے پارلیمانی بورڈ کے اجلاس کے بعد اخبار نویسوں سے گفتگو کر رہے تھے۔

اس سے قبل لاہور ہائی کورٹ کے الیکشن ٹریبونل نے نواز شریف اور شہباز شریف کے کاغذات نامزدگی قبول کیے جانے کے خلاف دائر مختلف درخواستوں پر سماعت مکمل ہونے کے بعد فیصلہ محفوظ کر لیا ہے۔

میاں نواز شریف نے کہا کہ ان کی اہلیت کے خلاف کوئی قانونی جواز ہے نہ کوئی درخواست ان کے خلاف باقی ہے۔ انہوں نے کہا قانونی طور پر ان کے خلاف دائر تمام اپیلیں واپس لی جا چکی ہیں اور اب کوئی اپیل باقی نہیں رہی۔

انہوں نے کہا کہ وہ دو بار منتخب وزیر اعظم ہیں اور اب بھی قوم نے انہیں مینڈیٹ دیا ہے۔ انہوں نے کہا کہ کیا یہ عدالتیں انہیں الیکشن میں حصہ لینے سے روکیں گی جنہیں وہ تسلیم ہی نہیں کرتے۔ ’وہ خود ہی اپیلیں بنا رہے ہیں اور خود ہی سن رہے ہیں۔ یہ قوم سے دھوکہ کیا جا رہا ہے۔‘

میاں نواز شریف نے کہا کہ آخر یہ سب کھیل تماشہ کیا ہے اور کون ہے جو پردے کے پیچھے سے بیٹھ کر ڈوریں ہلا رہا ہے؟ کون فیصلے کر رہا ہے۔‘

نواز شریف نے اپنے اس مؤقف کو دہرایا کہ وہ صدر پرویز مشرف کا مواخذہ چاہتے ہیں۔انہوں نے کہا کہ یہ نہ صرف ان کی بلکہ پوری قوم کی خواہش ہے کہ صدر مشرف جلد رخصت ہوں، ان کا مواخذہ ہو اور ان کے خلاف مقدمہ چلایا جائے۔

میں دو بار منتخب وزیر اعظم ہوں اور اب بھی قوم نے مجھے مینڈیٹ دیا ہے۔ کیا یہ عدالتیں مجھے الیکشن میں حصہ لینے سے روکیں گی جنہیں میں تسلیم ہی نہیں کرتا۔ وہ خود ہی اپیلیں بنا رہے ہیں اور خود ہی سن رہے ہیں۔ یہ قوم سے دھوکا کیا جا رہا ہے۔ میاں نواز شریف

انہوں نے بورڈ کے اجلاس کے حوالے سے بتایاکہ وہ میرٹ پر فیصلے کرتے ہیں ان کے دوہرے معیار نہیں ہیں۔

اس سے قبل جمعہ کے روز جسٹس اکرم قریشی اور جسٹس حافظ طارق نسیم پر مشتمل الیکشن ٹریبونل نے پاکستان مسلم لیگ نواز کے رہنما میاں نواز شریف اور شہباز شریف کے کاغذات نامزدگی قبول کرنے کے خلاف اپیلیں سنیں۔

ٹریبونل نے فریقین کے دلائل مکمل ہونے کے بعد اپیلوں پر فیصلہ محفوظ کر لیا۔

یہ اپیلیں نواز شریف اور شہباز شریف کے خلاف مختلف انتخابی حلقوں سے دائر کی گئی ہیں۔

سیالکوٹ کے حلقے پی پی 124 سے ذوالفقار علی گھمن، بھکر سے پی پی 48 سے سید خرم شاہ، لاہور کے پی پی 141 سے اظہر خان لودھی، لاہور کے ہی پی پی 154 سے سید خرم علی شاہ نے شہباز شریف کے کاغذات نامزدگیوں کو چیلنج کرتے ہوئے انہیں نااہل قرار دینے کی استدعا کی تھی۔

دریں اثناء قومی اسمبلی کے لاہور کے حلقے 123 سے نور الٰہی اور راولپنڈی کے حلقے باون سے ناصر راجہ نے میاں نواز شریف کے کاغذات نامزدگی مسترد کرنے کے لیے الیکشن ٹریبونل سے رجوع کیا تھا۔

جمعہ کو ہونے والی کارروائی میں میاں نواز شریف اور شہباز شریف کے وکلاء ٹریبونل میں پیش نہیں ہوئے۔ تاہم ممتاز قانون دان ایڈووکیٹ اکرم شیخ نے سول سوسائٹی کی طرف سے میاں نواز شریف اور شہباز شریف کے کاغذات نامزدگی کی حمایت میں دلایل دیئے۔

انہوں نے دلائل دیتے ہوئے کہا کہ جب صدر آئین کے آرٹیکل پینتالیس کے تحت کسی کی سزا معاف کر دیتے ہیں تو اس شخص کا جرم بھی ختم ہو جاتا ہے۔ انہوں نے کہا کہ چونکہ صدر نے ان کی سزا معاف کردی ہے اس لیے نواز شریف انتخابات لڑنے کے اہل ہیں اور ان کو کسی صورت بھی نا اہل قرار نہیں دیا جاسکتا۔

انہوں نے نواز شریف کے خلاف اپیلوں پر اعتراض اٹھایا کہ یہ اپیلیں مقررہ وقت ختم ہونے کے بعد کی گئی ہیں اس لیے یہ اپیلیں قابل سماعت نہیں ہیں۔

ٹریبونل کے سامنے وفاقی حکومت کی طرف سے ڈپٹی اٹارنی جنرل ندیم الدین نےاپنے دلائل میں کہا کہ ان کے سامنے اس نوٹیفیکیشن کی کاپی موجود نہیں ہے جس سے وہ بتا سکیں کہ آیا نواز شریف کی سزا جزوی طور پر معاف کی گئی تھی یا مکمل طور پر۔

ایڈیشنل ایڈووکیٹ جنرل پنجاب حنیف کھٹانا نے صدر آئین کے آرٹیکل پینتالیس کے تحت کسی کی سزا معاف کر سکتے ہیں۔

الیکشن ٹریبونل کی سماعت پر سابق صدر رفیق تارڑ، سابق چیف جسٹس لاہور ہائی کورٹ جسٹس خلیل الرحمٰن خان، بشریٰ اعتزاز، ڈپٹی سپیکر پنجاب اسمبلی رانا مشہود، مسلم لیگ نواز کے رکن قومی اور صوبائی اسمبلی بھی موجود تھے۔

ایک بڑی تعداد مسلم لیگ نواز کے کارکنوں کی بھی موجود تھی جنہوں نے نواز شریف اور شہباز شریف کے حق میں نعرے بازی کی۔