ریاض سہیل بی بی سی اردو ڈاٹ کام، کراچی

	پاکستان مسلم لیگ نواز کا پرچم

پولیس کے مطابق مسلم لیگی رہنما طارق خان اپنی پجیرو گاڑی میں طارق روڈ سے شہید ملت روڈ کی طرف جا رہے تھے کہ موٹرسائیکل پر سوار نامعلوم مسلح افراد نے ان پر فائرنگ شروع کردی۔ جس میں وہ شدید زخمی ہوگئے۔

انہیں فوری طور پر جناح ہسپتال لے جایا گیا۔ جہاں پر ڈاکٹروں نے ان کی ہلاکت کی تصدیق کی۔

کراچی پولیس کے سربراہ بابر خٹک کے مطابق طارق خان کو چھ گولیاں لگی ہیں۔ جس میں دو سر پر اور چار سینے پر لگیں۔ حملے کے وقت طارق خان گاڑی میں اکیلے تھے۔

طارق خان مسلم لیگ نون کے اہم رہنما تھے۔ اس سے قبل بارہ مئی کو ان کے جلوس پر حملہ ہوا تھا۔

مسلم لیگ ن کے سربراہ میاں محمد نواز شریف نے طارق خان کے قتل کی مذمت کی ہے۔ اور حکومت سندھ سے مطالبہ کیا ہے کہ ان کے قاتلوں کو فوری طور پر گرفتار کر لیا جائے۔

پارٹی کے صوبائی رہنما سردار رحیم کا کہنا ہے کہ یہ ایک سیاسی قتل ہے۔ طارق خان کی کسی سے کوئی ذاتی دشمنی نہیں تھی۔ جب سردار رحیم سے پوچھا گیا کہ ان کے قتل میں کون ملوث ہو سکتا ہے تو انہوں نے کہا کہ جب پولیس تفتیش کرے گی تو تمام چیزیں سامنے آ جائیں گی۔

طارق خان کی ہلاکت کی اطلاع ملنے پربڑی تعداد میں مسلم لیگ کے کارکن جناح ہسپتال پہنچ گئے۔ اور اس موقع پر ہوائی فائرنگ بھی کی گئی اور کارکن ’پختون کی ہے روایت خون کا بدلہ خون‘ ہے نعرہ لگاتے رہے۔

یہ ایک سیاسی قتل ہے  کا کہنا ہے کہ یہ ایک سیاسی قتل ہے۔ طارق خان کی کسی سے کوئی ذاتی دشمنی نہیں تھی۔ جب سردار رحیم سے پوچھا گیا کہ ان کے قتل میں کون ملوث ہو سکتا ہے تو انہوں نے کہا کہ جب پولیس تفتیش کرے گی تو تمام چیزیں سامنے آ جائیں گی سردار رحیم

طارق خان کو زخمی حالت میں ہسپتال لانے والے ایس ایچ او نیو ٹاؤن زبیر خان نے بتایا کہ انہیں اطلاع ملی کہ شہید ملت روڈ پر فائرنگ ہوئی ہے وہ جیسے ہی واقعے والی جگہ پہنچے تو لوگوں کا مجمع لگا ہوا تھا اور طارق خان گاڑی کے اندر شدید زخمی حالت میں موجود تھے وہ ان کو ہسپتال لائے مگر وہ انتقال کرچکے تھے ۔