عزیزاللہ خان بی بی سی اردو ڈاٹ کام، کوئٹہ

	سرادار عطا اللہ مینگل کا کہنا ہے کہ حکومت بے بس دکھائی دیتی ہے

بلوچستان نیشنل پارٹی کے کارکن بڑی تعداد میں شام کے وقت سڑکوں پر نکل آئے اور حکومت کے خلاف نعرہ بازی کی۔

مظاہرین نےکوئٹہ میں سریاب روڈ خضدار میں عوامی ہوٹل کے پاس اور حب میں آر سی ڈی شاہراہ کو ہر قسم کی ٹریفک کے لیے بند کر دیا۔ وڈھ آواران اور دیگر شہروں میں بھی احتجاجی مظاہرے کے گئے۔

کراچی میں لیاقت نیشنل ہسپتال میں موجود سردار اختر مینگل کی رہائی کے حوالے سے خبریں دو روز سے مختلف چینلز پر آرہی ہیں اور جمعرات کو بلوچستان نیشنل پارٹی کے کارکن بڑی تعداد میں ہسپتال کے باہر موجود تھے جہاں یہ توقع کی جا رہی تھی کہ انھیں رہا کر دیا جائے گا۔

سردار اختر مینگل لیاقت نیشنل ہسپتال کے نیوروسرجری وارڈ میں ہیں جسے سب جیل قرار دیا گیا ہے۔

اس بارے سردار عطاء اللہ مینگل سے رابطہ کیا گیا تو انھوں نے کہا کہ حکومت سارے معاملے میں بے اختیار نظر آ رہی ہے۔

انھوں نے کہا کہ ’وزیر اعظم کے احکامات کے باوجود اب یہ کہا جا رہا ہے کہ ایجنسیوں کے وہ دو اہلکار جنھوں نے مقدمہ درج کرایا تھا وہ نہیں مان رہے تو پھر اس سے بڑھ کر بھونڈا بہانہ کیا ہو سکتا ہے‘۔

سردار عطاءاللہ مینگل نے کہا کہ اب بھی سب کچھ فوج اور ایجنسیوں کے پاس ہے اور جب وہ چاہیں گے تو عمل ہوگا۔

یاد رہے سردار اختر مینگل کی رہائی کے احکامات وزیر اعظم یوسف رضا گیلانی نے ایک ہفتہ پہلے کوئٹہ کے دورے کے دوران جاری کیے تھے اور گزشتہ دو روز سے یہ کہا جا رہا ہے کہ محکمہ داخلہ نے ان کے رہائی کے احکامات جاری کر دیے ہیں اور انھیں کسی بھی وقت رہا کیا جا سکتا ہے لیکن اب تک انھیں رہا نہیں کیا گیا ہے۔

سردار اختر مینگل گزشتہ ڈیڑھ سال سے گرفتار ہیں۔ انھیں نومبر دو ہزار چھ میں حب میں اس وقت حراست میں لے لیا گیا تھا جب بی این پی نے لشکر بلوچستان کے نام سے گوادر سے کوئٹہ تک لانگ مارچ شروع کرنا تھا۔

اس کے بعد اپریل میں ان پر سرکاری اہلکاروں کے اغوا اور ان پر تشدد کا مقدمہ درج کرکے کراچی میں باقاعدہ گرفتار کر لیا گیا تھا۔

پیپلز پارٹی کی حکومت بننے کے بعد بلوچستان میں ان کے خلاف تمام مقدمات واپس لے لیے گئے ہیں جبکہ وزر اعظم نے دیگر صوبوں اور وفاقی حکومت میں بھی ان کے خلاف تمام مقدمات واپس لینے کے احکامات جاری کیے ہیں۔