عزیزاللہ خان بی بی سی اردو ڈاٹ کام، کوئٹہ

	نواب اسلم رئیسانی کا انتخاب بدھ کو ہوا اور بدھ ہی کو انہوں نے حلف لیا اور اعتماد کا ووٹ حاصل کیا ہے

چیف آف سراوان سے وزیرِاعلیٰ تک

بلوچستان اسمبلی میں موجود اکسٹھ میں سے ستاون اراکین موجود تھے اور تمام نے کھڑے ہو کر نواب اسلم رئیسانی پر اعتماد کا اظہار کیا ہے۔

اسمبلی میں اپنے خطاب میں نواب اسلم رئیسانی نے کہا ہے کہ بلوچستان میں فوجی آپریشن فوری طور پر بند کیا جائے وگرنہ اس طرح کی کارروائیاں عام آدمی کے دلوں مں بھی ایسی نفرت پیدا کر دیں گی جو مرتے دم تک ختم نہیں ہونگی۔

انہوں نے محترمہ بے نظیر بھٹو نواب اکبر بگٹی اور میر بالاچ مری کو خراج تحسین پیش کیا ہے اور کہا ہے کہ ان لوگوں کی قربانیوں سے جمہوریت کے لیے راستہ ہموار ہوا ہے۔ انہوں نے صوبائی خودمختاری کا مطالبہ دہراتے ہوئے کہا کہ وفاق کے پاس تین محکمے ہونے چاہیں اور باقی صوبوں کے حوالے کرنا چاہیں۔ اس کے علاوہ انہوں نے سینیٹ کو با اختیار بنانے کا مطالبہ کیا۔

فوجی آپریشن بند کیا جائے بلوچستان میں فوجی آپریشن فوری طور پر بند کیا جائے وگرنہ اس طرح کی کارروائیاں عام آدمی کے دلوں مں بھی ایسی نفرت پیدا کر دیں گی جو مرتے دم تک ختم نہیں ہونگی

نواب اسلم رئیسانی نے اپنے انتخاب کے بعد کہا تھا کہ اپنا گھر بارچھوڑ کر ہتھیار اٹھانے والے افراد سے مذاکرات کیے جائیں گے اور ان کے تحفظات کو دور کیا جائے گا۔

یہاں یہ امر قابل ذکر ہے کہ اپنے آپ کو بلوچ کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے ٹیلیفون پر کہا ہے کہ فوجی آپریشن بند کرنے کے حوالے سے اسمبلیوں کی قرار دادوں اور بیانات پر انہیں یقین نہیں ہیں اور نہ ہی وہ اس وقت تک مذاکرات کے لیے تیار ہیں جب تک فوج یہاں موجود ہے۔

اس سے پہلے گورنر بلوچستان نواب ذوالفقار مگسی نے نواب اسلم رئیسانی سےگورنر ہاؤس میں حلف لیا جس کے بعد پنڈال میں موجود پیپلز پارٹی کے کارکنوں نے زبردست نعرہ بازی کی ہے۔