ریاض سہیل بی بی سی اردو ڈاٹ کام ،کراچی

	ملزمان کو ڈی این اے ٹیسٹ کی رپورٹ پازیٹو آنے پر گرفتار کیا

کراچی میں پولیس نے قائد اعظم کے مزار میں ایک نوبیاہتا دلہن کے ساتھ مبینہ جنسی زیادتی کے الزام میں مزید دو ملزمان کو گرفتار کرلیا ہے۔

مزارِ قائد پر دلہن سے اجتماعی زیادتی

تفتیشی پولیس کا کہنا ہے کہ عارف انصاری اور محمد راجہ عارف کے ڈی این اے ٹیسٹ کرائے گئے تھے جس کی اسلام آباد کی لیبارٹری سے رپورٹ پازیٹو آنے کے بعد دونوں کو گرفتار کیا گیا ہے۔

متاثرہ خاتون رضیہ شناختی پریڈ کے دوران صرف ایک ملزم خادم علی شاھ کی شناخت کرسکیں تھیں جس کے بعد دیگر مشتبہ افراد کی شناخت کے لیے ڈی این اے ٹیسٹ کرائے گئے۔

واضح رہے کہ پولیس نے پندرہ مارچ کی صبح کو ایک نوبیاہتا دلہن کو پاکستان کے بانی محمد علی جناح کے مزار سے برآمد کیا تھا جس کو مزار میں واقع میوزیم کے ایک سٹور میں دو روز تک حبسِ بے جا میں رکھ کر مبینہ اجتماعی زیادتی کا نشانہ بنایا گیا تھا۔

خاتون رضیہ نے پولیس کو بتایا تھا کہ انہیں دو افراد نے گن پوائنٹ پر اغواء کیا اور شراب پلانے کے بعد پانچ افراد اسے دو روز تک اجتماعی زیادتی کا نشانہ بناتے رہے۔

پولیس نے خاتون کے کپڑے، میوزیم کے سٹور سے خاتون کے ٹوٹے ہوئے بال اور دیگر شواہد محفوظ کیے تھے۔

ان کی دو ماہ قبل شادی ہوئی تھی اور وہ اپنے خاندان کے دیگر افراد کے ساتھ لودھراں سے لال شہباز قلندر کے مزار کی زیارت کے بعد کراچی سیر کرنے آئی تھیں۔