عبدالحئی کاکڑ بی بی سی اردوڈاٹ کام، پشاور

	طالبان کی ویڈیو سے لی گئی ایک تصویر

یہ گزشتہ چند سالوں کے دوران ہونے والے اغواء کی اس طرح کی بظاہر پہلی واردات ہے۔

دبئی میں قائم العربیہ ٹی وی پر نشر کی جانے والی اس ویڈیو میں پاکستانی سفیر نے محض اتنا کہا ہے کہ ’حکومت انکی کی رہائی کے لیے طالبان کے مطالبات مان لے‘ مگر ان سے یہ نہیں کہلوایا گیا کہ طالبان کے مطالبات ہیں کیا۔

سفیر کے اغواء کے چند دنوں بعد طالبان ترجمان کے حوالے سے ذرائع ابلاغ پر یہ خبر نشر ہوئی تھی کہ پاکستانی سفیر کو ایک طالبان کمانڈر کی رہائی کے عوض چھوڑ دیا جائے گا تاہم اس بیان میں ترجمان کا نام ظاہر نہیں کیا گیا تھا اور نہ ہی یہ بتایا گیا تھا کہ ان کا تعلق طالبان کے کس گروپ کے ساتھ ہے۔ تب پاکستان اور افغانستان میں طالبان ترجمان مولوی عمر اور قاری یوسف نے سفیر کے اغواء سے لاعلمی ظاہر کی تھی۔

طالبان کی جانب سےسفیر کے اغواء کرنے کی ذمہ داری قبول کرنے میں اتنی تاخیر نے اس پورے معاملہ پر ایک سوالیہ نشان لگا دیا ہے۔ یہ بھی ممکن ہے کہ حکومت اور طالبان کے درمیان پس پردہ مذاکرات جاری ہوں اور شاید ویڈیو کے جاری کرنے کی ضرورت اس لیے پیش آئی ہو کہ فریقین کے درمیان جاری بات چیت میں کوئی خاص پیش رفت نہ ہونے کے سبب طالبان نے دباؤ ڈالنے کے لیے ایسا کیا ہو۔ پس پردہ مذاکرات کا ا ندازہ اس بات سے بھی لگایا جاسکتا ہے کہ سفیر نےاپیل کے دوران مطالبات کی نوعیت کے بارے میں کچھ بھی نہیں کہا جس سے لگتا ہے کہ حکومت کو پہلے ہی سے ان مطالبات کا پتہ ہے۔

سوالیہ نشان  یہ بھی ممکن ہے کہ حکومت اور طالبان کے درمیان پس پردہ مذاکرات جاری ہوں اور شاید ویڈیو کے جاری کرنے کی ضرورت اس لیے پیش آئی ہو کہ فریقین کے درمیان جاری بات چیت میں کوئی خاص پیش رفت نہ ہونے کے سبب طالبان نے دباؤ ڈالنے کے لیے ایسا کیا ہو۔

اگر دیکھا جائے تو دوہزار ایک میں طالبان کی حکومت کے خاتمے کے بعد پاکستان اور افغانستان میں طالبان کے ایک قوت کے طور پر ابھر کر سامنے آنے کے بعد اغواء کی وارداتوں میں اضافہ ہوا ہے۔ طالبان اور حکومتی ذرائع کا کہنا ہے کہ اغواء برائے تاوان طالبان کے لیے ایک بہت ہی منافع بخش کاروبار ثابت ہوا ہے جس کے ذریعے سے وہ دونوں ممالک میں امریکی، نیٹو اور پاکستانی فوج کے خلاف اپنی کارروائیاں جاری رکھے ہوئے ہیں۔

جب سے افغانستان اور پاکستان میں طالبان نے امریکی، نیٹو اور پاکستانی افواج کے خلاف جنگ شروع کی ہے طالبان ذرائع کے بقول کمزور مالی حالت نے کئی بار انکی مزاحمت کو کمزور کر دیا مگر انہوں نے مختلف طریقوں سے اپنی مالی حالت مضبوط کرنے میں بہت حد تک کامیابی حاصل کی ہے۔

جنوبی وزیرستان میں گزشتہ سال جن تین سو کے قریب فوجیوں کو گرفتار کیا گیا تھا انکی جو ویڈیوز حال ہی میں بی بی سی اردو کو بھیجی گئی تھیں ان میں فوجیوں کے علاوہ وہ تمام اسلحہ، فوجی سازوسامان اور گاڑیاں دکھائی گئی ہیں جنہیں ویڈیو میں طالبان’ مال غنیمت‘ کہتے ہوئے اپنے قبضہ میں لے رہے ہیں۔

ایک طالب کمانڈر نے بی بی سی کو بتایا ہےکہ انہوں نے گاڑیوں سمیت اسلحہ، فوجی وردیاں، بوٹ، بیلٹ، ٹوپیاں اور دیگر سازسامان کی قیمت لگائی اور اسے چھ کروڑ روپے کے عوض حکومت پاکستان کو واپس کیا تھا۔

دوسری طرف افغانستان میں ویسے تو ابتداء ہی سے امریکہ اور یورپی ممالک طالبان پر الزام لگاتے آرہے ہیں کہ وہ افغانستان میں پوست کی کاشت میں ملوث ہیں اور ان کے ’ڈرگ مافیا‘ سے قریبی روابط قائم ہوچکے ہیں لیکن ان چند سالوں کے دوران اب طالبان کے دونوں ممالک میں سرگرم مبینہ ’اغواء کار گروپوں‘ کے ساتھ بھی بظاہر اچھے تعلقات پیدا ہوگئے ہیں۔

خرچہ پانی  پچھلے سال بیس فروری کو افغانستان میں غزنی کے علاقے سے طالبان نے جن تئیس جنوبی کوریائی باشندوں کو اغواء کیا تھا انکی رہائی کے بدلے قابل اعتماد ذرائع کےمطابق جنوبی کوریا نے طالبان کوچھ ملین ڈالر کی رقم ادا کردی تھی۔

پچھلے سال بیس فروری کو افغانستان میں غزنی کے علاقے سے طالبان نے جن تئیس جنوبی کوریائی باشندوں کو اغواء کیا تھا انکی رہائی کے بدلے قابل اعتماد ذرائع کےمطابق جنوبی کوریا نے طالبان کوچھ ملین ڈالر کی رقم ادا کردی تھی۔ ذرائع کے مطابق دو ہزار سات میں بھی فرانس کے دو امدادی کارکنوں کی رہائی کے بدلے طالبان کو چار ملین ڈالر اد کیے گئے تھے۔ اس کے علاوہ اغواء برائے تاوان کے عوض طالبان کو مبینہ طور پر بھاری رقمیں ادا کرنے کے کئی واقعات پیش آئے ہیں۔

اغواء برائے تاوان کی وارداتوں کے نتیجے میں طالبان ذرائع کے بقول انکی معاشی حالت کافی حد تک مضبوط ہوگئی ہے۔انکا کہنا ہے کہ ایک وقت ایسا بھی آیا تھا کہ ’ہمارے پاس خودکش بمبار تو بہت بڑی تعداد میں موجود تھے مگر مالی وسائل اتنے محدود ہوگئے تھے کہ کسی خودکش حملے کے لیے کار خرید کر اس سے بارود سے بھرنا تو درکنار ہر خودکش حملہ آور کو بارودی جیکٹ جس کی تیاری پر تقریباً پینسٹھ ہزارروپے خرچہ آتا ہے، دینا مشکل ہوگیا تھا‘۔

طالبان کے مطابق خود کش کار حملے پر اوسطا پانچ لاکھ روپے کا خرچہ آتا ہے اور اب جبکہ طالبان کی مالی حالت کافی بہتر ہوئی ہے تو انہوں نے کاریں خرید کر افعانستان میں زیادہ خود کش کار حملے شروع کردیئے ہیں۔

اس پس منظر میں کہا جا سکتا ہے کہ افغانستان اور پاکستان میں دہشت گردی کے خلاف جاری نام نہاد جنگ میں امریکہ اور اتحادی ممالک کے لیے اغواء کی بڑھتی ہوئی وارداتیں ایک بڑے چیلنج کے طور پر سامنے آرہی ہیں کیونکہ اس سے نہ صرف طالبان مالی فوائد حاصل کر رہے ہیں بلکہ جب کبھی کسی بھی اتحادی ملک کے شہریوں کو یرغمال بنایا جاتا ہے تو اس ملک پر اپنے عوام کا دباؤ بڑھ جاتا ہے۔ جنوبی کوریا کی جانب سے افغانستان سے اپنے فوجیوں کے انخلاء کا اعلان اسکی ایک واضح مثال ہے۔