اعجاز مہر بی بی سی اردو ڈاٹ کام، اسلام آباد

	سیاسی جماعتیں اور سول سوسائٹی پیمرا قوانین کے خلاف احتجاج کر تی رہی ہیں (فائل فوٹو)

یہ بات وزیراطلاعات و نشریات شیری رحمٰن نے کابینہ کے اجلاس کے بعد نیوز بریفنگ میں بتائی۔ انہوں نے کہا کہ وزیراعظم یوسف رضا گیلانی کی صدرات میں منعقد کابینہ کے اجلاس میں منظوری کے بعد دس اپریل سے شروع ہونے والے قومی اسمبلی کے اجلاس میں متعلقہ قوانین کی تنسیخ اور ترمیم کے بل پیش ہوں گے۔

میڈیا پر کنٹرول کے لیے نئے قوانین

واضح رہے کہ میڈیا پر صدر مشرف کے پابندیوں کے بارے میں قوانین میں جہاں اشاعتی اور نشریاتی اداروں کے لائیسنس منسوخ کرنے، بنا نوٹس آلات ضبط کرنے اور متعلقہ صحافیوں اور میڈیا مالکان کو گرفتار کرنے کے اختیارات حکومت کو دیے گئے تھے وہاں انہیں بھاری جرمانے عائد کرنے کا بھی حق حاصل تھا۔

متعلقہ قوانین کے تحت صدر، افواج پاکستان، عدلیہ، اور اراکین اسمبلی پر تنقید کرنے پر بھی پابندی تھی اور خلاف ورزی کرنے والے کو فوری گرفتار کرنے کا حکومت کو اختیار حاصل تھا۔

بینکوں سے بے تحاشہ قرضے لیے  سابق وزیراعظم شوکت عزیز کی حکومت نے بینکوں سے بے تحاشہ قرضے لیے ہیں جس کی وجہ سے ملکی و غیر ملکی قرضوں اور ان پر ادا کی جانے والی شرح سود کی رقم حد سے زیادہ ادا کرنی پڑے گی اسحاق ڈار

بریفنگ کے دوران وزیر خزانہ اسحٰق ڈار بھی موجود تھے اور انہوں نے بتایا کہ سابقہ حکومت اور نگران حکومت نے نئی جمہوری حکومت کے لیے وسائل نہیں بلکہ مسائل کا انبار چھوڑا ہے۔

وزیر خزانہ نے بتایا کہ سابقہ حکومت عوام کو گمراہ کرنے کے لیے غلط بیانی کرتی رہی جبکہ ان کے بقول حقائق ان کے دعوؤں کے برعکس ہیں۔

انہوں نے سابقہ حکومت پر اعداد و شمار میں ہیر پھیر کا الزام عائد کیا اور انہیں تمام اقتصادی برائیوں کی جڑ سے تعبیر کیا۔

تاہم انہوں نے دعویٰ کیا کہ وہ حالات کو سنبھالیں گے اور تمام شعبوں میں بہتری لانے اور ابتری کو کم سے کم کرنے کے اقدامات اٹھائیں گے۔

اسحٰق ڈار نے کہا کہ سابق وزیراعظم شوکت عزیز کی حکومت نے بینکوں سے بے تحاشہ قرضے لیے ہیں جس کی وجہ سے ملکی و غیر ملکی قرضوں اور ان پر ادا کی جانے والی شرح سود کی رقم حد سے زیادہ ادا کرنی پڑے گی۔