اعجاز مہر
بی بی سی اردو ڈاٹ کام، اسلام آباد |  |
| | | پیمرا پر ایسے الزامات پہلے بھی لگائے گئے ہیں |
پاکستان کے پارلیمانی امور کے وزیر ڈاکٹر شیر افگن نیازی نے اقرار کیا ہے کہ میڈیا کو ریگولیٹ کرنے والے ادارے ’پیمرا‘ نے دو ٹی وی چینلز کو سزا دینے کی خاطر انہیں نوٹس جاری کیے اور اس ادارے نے پارلیمان کو مذاق بنا رکھا ہے۔ انہوں نے قومی اسمبلی میں پیمرا کی جانب سے مختلف ٹی وی چینلز کو لائسنس منسوخ کیے جانے کے بارے میں جاری کردہ شو کاز نوٹس کے خلاف حزب مخالف کی جمع کرائی گئی چھ تحاریک التویٰ کا ذکر کرتے ہوئے کہا کہ اس بارے میں پیمرا کے مجاز حکام جواب ہی نہیں دے رہے۔ انہوں نے مطالبہ کیا کہ حزب مخالف کی تحاریک پر بحث کرائی جائے اور معاملہ سٹینڈنگ کمیٹی کو بھجوایا جائے تاکہ پیمرا کے ذمہ داران افسران کے خلاف کارروائی کی جاسکے۔ وفاقی وزیر کے اس غیرمتوقع بیان کے بعد پارلیمانی امور کی پارلیمانی سیکریٹری ڈاکٹر عاشق فردوس اعوان نے وضاحت کی کہ پیمرا حکام کو رات گیارہ بجے جواب دینے کے لیے نوٹس ملا اور انہوں نے شیر افگن نیازی کے گھر فون کیا تو انہیں بتایا گیا کہ وہ دوائی کھا کر سو رہے ہیں۔ وزیر نے کہا کہ پیمرا والے غلط بیانی کر رہے ہیں کیونکہ وہ رات کو ساڑھے گیارہ بجے تک سوئے اور نہ ہی کوئی رات کی دوائی کھاتے ہیں۔ |  یہ پہلا موقع ہے کہ ایک وفاق وزیر نے اقرار کیا ہے کہ پیمرا نے نجی ٹی وی چینلز کو سزا دینے کے لیے انہیں نوٹس جاری کیے ہیں اور حزب مخالف کی طرح وزیر نے بھی پیمرا حکام کے خلاف کارروائی کا مطالبہ کیا ہے۔  |
اس دوران حکومت کے دو ذمہ داران میں اختلاف رائے جب کھل کر سامنے آئے تو حزب مخالف کی جماعت پیپلز پارٹی کے سرکردہ رہنما راجہ پرویز اشرف نے بات کرنا چاہی لیکن سپیکر چودھری امیر حسین نے انہیں سختی سے منع کردیا۔ ڈاکٹر شیر افگن نیازی نے کہا کہ پیمرا والوں نے ایوان کا استحقاق مجروح کیا ہے اور انہوں نے ایوان کے تقدس کی کی بحالی کا حلف اٹھایا ہوا ہے اس لیے ان کے خلاف کارروائی ہونی چاہیے۔ ان کے مطابق پیمرا کے بورڈ کا اجلاس بھی کافی عرصے سے نہیں ہوا۔ پارلیمانی سیکریٹری عاشق فردوس اعوان نے کہا کہ ایسی بات نہیں ہے اصل میں پیمرا کو جواب دینے کے لیے ایک روز کی مہلت چاہیے اور وزیر کو اپنی انا کا مسئلہ نہیں بنانا چاہیے۔ ڈاکٹر شیر افگن نیازی نے کہا کہ رات کو پارلیمان سے گیارہ بجے نوٹس ملنے کی بات صریحاً جھوٹ ہے اور اس میں کوئی چکر ہے۔ ان کے مطابق ایسی غلط بیانی کرنے والوں کو ضرور سزا ملنی چاہیے۔ سپیکر چودھری امیر حسین نے کہا کہ حضرت علی کا قول ہے کہ ’جس سے نیکی کرو اس کے شر سے بچو‘۔ ان کے مطابق پیمرا کو رات کو گیارہ بجے نوٹس بھیجنے کی بات باالکل غلط ہے۔ اس دوران راجہ پرویز اشرف نے اس معاملے پر سختی سے زور دیا اور کہا کہ حزب مخالف کی تحاریک التویٰ پر بحث کا وقت مقرر کریں جس پر سپیکر نے انہیں کہا کہ انہیں اگر اس پر پریس کانفرنس کرنی ہے تو ایوان سے باہر کریں۔ حکمران اتحاد کے چیف وہپ سردار نصراللہ دریشک نے کہا کہ وہ اس بارے میں حزب مخالف کی جماعتوں کے نمائندوں سے بات کر کے معاملہ طے کریں گے۔ واضح رہے کہ آج ٹی وی اور رائل ٹی وی کی انتظامیہ کا دعویٰ ہے کہ حکومت نے چیف جسٹس کی کوریج پر ناراضگی کا اظہار کرتے ہوئے ان کی نشریات متاثر کی ہیں اور انہیں نوٹس جاری کیا ہے۔ یہ پہلا موقع ہے کہ ایک وفاق وزیر نے اقرار کیا ہے کہ پیمرا نے نجی ٹی وی چینلز کو سزا دینے کے لیے انہیں نوٹس جاری کیے ہیں اور حزب مخالف کی طرح وزیر نے بھی پیمرا حکام کے خلاف کارروائی کا مطالبہ کیا ہے۔ | 
باجوڑ: قبائل اور حکومت میں معاہدہ
