اعجاز مہر بی بی سی اردو ڈاٹ کام، اسلام آباد

	دو نجی ٹی وی چینلز کے خلاف حکومتی کارروائی پر احتجاج

ایک ٹی وی چینل کو آج نشریات بند کرنے کے بارے میں شو کاز نوٹس ملنے اور رائل ٹی وی کی نشریات مبینہ طور پر بند کرنے کے خلاف پہلے صحافیوں نے قومی اسمبلی کی پریس گیلری سے واک آؤٹ کیا بعد میں اپوزیشن نے بھی ان سے اظہار یکجہتی کے لیے ایوان سے واک آؤٹ کیا۔

راجہ پرویز اشرف، لیاقت بلوچ اور تہمینہ دولتانہ سمیت حزب مخالف کی تمام جماعتوں کے کئی اراکین نے نکتہ اعتراضات پر بات کرتے ہوئے کہا کہ حکومت ’پیمرا‘ کے ذریعے میڈیا پر پابندیاں عائد کرکے اظہار رائے کا حق صلب کر رہی ہے۔

حزب مخالف کے اراکین نے حکومت پر سخت نکتہ چینی کی اور کہا کہ عدالتی بحران کی کوریج کے حوالے سے حکومت میڈیا کو حقائق عوام کے سامنے لانے سے روک رہی ہے۔

وزیر محنت غلام سرور خان اس دوران پریس لاؤنج میں آئے اور صحافیوں کو یقین دلایا کہ وہ ’پیمرا‘ کی جانب سے کی گئی کارروائی کی تحقیقات کرائیں گے اور اگر بلا وجہ انہوں نے کوئی اقدام کیا ہوگا تو ذمہ دار افسران کے خلاف کارروائی کی جائے گی۔

الیکٹرانک میڈیا ابلاغ کو ریگولیٹ کرنے والے ادارے ’پاکستان الیکٹرانک میڈیا ریگولیٹری اتھارٹی، یعنی ’پیمرا، کے بارے میں حکومت کہتی ہے کہ وہ ایک خود مختار ادارہ ہے۔

حزب مخالف کا موقف ہے کہ حکومت اس ادارے کو اپنے سیاسی مقاصد کے لیے استعمال کر رہی ہے۔ جبکہ حکومت اس تاثر کو رد کرتی ہے۔

حزب مخالف کی سیاسی جماعتوں کے جانب سے نجی ٹی وی جیو کے دفتر پر حملے، آج کو شوکاز نوٹس دینے، رائل ٹی وی سمیت مختلف چینلز کی نشریات منقطع کرنے اور صحافیوں کو دھمکیاں دینے کے بارے میں ملتی جلتی چھ تحاریک التویٰ قومی اسمبلی میں پیش کیں۔

حکومت نے ان کی مخالفت کی اور سپیکر نے کہا کہ اس بارے میں ایوان کے آئندہ اجلاس میں بحث کرائی جائے گی۔