علی سلمان بی بی سی اردو ڈاٹ کام لاہور

	شہباز شریف ضمنی انتخاب لڑیں گے

بینظیر بھٹو کے قتل کی تحقیقات اقوام متحدہ سے کروانے کے بارے میں پیش کی گئی قرار داد پنجاب اسمبلی کے تین سو تریپن اراکین نے متفقہ طور پر منظور کی۔ اس قرار داد میں صوبائی اسمبلی نے وفاقی حکومت سے مطالبہ کیا ہے کہ اس قتل کی تحقیقات اقوام متحدہ سے کروائی جائے۔

تاہم بارہ اکتوبر انیس سو ننانوے کو فوج کے اقتدار پر قبضہ کرنے کی مذمتی قرار داد کے حق میں سابق حکمران جماعت مسلم لیگ ق کے اراکین نے ووٹ نہیں دیا۔

دوسری قرار داد میں شریف خاندان اور بینظیر بھٹو کو جلا وطن، سیاسی رہنماوں اور کارکنوں پر ریاستی تشدد اور آصف علی زرداری کو قید رکھنے کی مذمت بھی کی گئی۔

اس سے قبل اٹھارہ فروری کو منتخب ہونے والی پنجاب اسمبلی کے پہلے اجلاس میں تین سو تریپن نومنتخب اراکین نے اپنی رکنیت کا حلف اٹھا لیا ہے۔

اجلاس میں پاکستان پیپلز پارٹی کے کارکنوں نے بینظیر بھٹو کے قتل کی مذمت میں اپنے بازوں پر سیاہ پٹیاں باندھ کر ایوان کی کارروائی میں حصہ لیا۔

پنجاب اسمبلی کے اراکین کی مجموعی تعداد تین سو اکہتر ہے دس امیدواروں نے قومی اسمبلی میں کامیابی کے بعد نشست چھوڑ دی ہے دو امیدواروں نے دو دونشستوں پر کامیابی حاصل کی تھی اور پانچ حلقوں کے انتخابات امیدوار کی وفات کی وجہ سے منسوخ ہوئے اور ایک کے نتائج عدالت نے روک رکھے ہیں۔

مسلم لیگ ق کے اراکین کا یہ بائیکاٹ اسمبلی میں گیارہ اپریل کو سپیکر اور ڈپٹی سپیکر کے الیکشن کے دوران بھی جاری رہے گا۔

پنجاب میں اکثریت حاصل کرنے والی جماعت پاکستان مسلم لیگ (نون) کے صدر میاں شہباز شریف نے سردار دوست محمد کھوسہ کو وزیر اعلی کا امیدوار نامزد کر دیا ہے جبکہ رانا محمد اقبال کو سپیکر اور رانا مشہود کو ڈپٹی سپیکر کے عہدوں پر نامزد کیا ہے۔

مسلم لیگ نون کی طرف سے کیئے گئے اعلان کے مطابق میاں شہباز شریف کے ضمنی انتخابات میں منتخب ہونے تک سردار دوست محمد کھوسہ وزیر اعلی کی ذمہ داریاں نبھاتے رہیں گے۔

اراکین کے حلف اٹھانے کے بعد سیکریٹری پنجاب اسمبلی نے اسپیکر اور ڈپٹی اسپیکر کے عہدوں پر انتخابات کا اعلان کرتے ہوئے کہا کہ جمعرات کی شام تک امیدوار اپنے کاغذات نامزدگی جمع کروا سکتے ہیں۔

اجلاس میں شرکت کی خواہش سے آنے والے پاکستان پیپلز پارٹی کے درجنوں کارکنوں نے اسمبلی ہال میں داخل ہونے کی اجازت نہ ملنے کی وجہ سے صوبائی اسمبلی کے باہر احتجاج کیا اور نعرے لگائے۔

مسلم لیگ قاف نے چودھری ظہیر الدین کو قائد حزب اختلاف نامزد کررکھا ہے اور کل ان کی قیادت میں مسلم لیگ قاف کے اراکین اسمبلی ایوان میں پہنچیں گے۔