ریاض سہیل بی بی سی اردو ڈاٹ کام، کراچی

	ارباب غلام رحیم اسمبلی کے ایوان میں داخل ہوئے تو سپیکر کے عقب کی گیلری میں سے ایک کارکن نے انہیں جوتا اتار کر مارا

ہنگامہ آرائی کے دوران سابق وزیراعلیٰ ارباب غلام رحیم کو تشدد کا نشانہ بنایا گیا جس کے بعد ایم کیو ایم اور مسلم لیگ فنکشنل نے اجلاس کا بائیکاٹ کردیا۔

صوبائی اسمبلی کی کارروائی جو کہ دس بجے شروع ہونا تھی ڈھائی گھنٹے کی تاخیر سے شروع ہوئی۔ اسمبلی کے پہلے اجلاس میں غیر متعلقہ افراد کے اسمبلی کی گیلریوں میں داخلے اور نعرے بازی کی وجہ سے بہت سےکارڈ منسوخ کیے گئے پھر بھی بڑی تعداد میں پیپلز پارٹی کے کارکن وہاں موجود رہے ۔

پیپلز پارٹی کی قیادت نے لوگوں کو پرسکون رہنے کی تاکید کی مگر وہ خاموش نہیں ہوئے۔ پیپلز پارٹی کے نامزد سپیکر نثار کھوڑو نے بھی مائیک پر کارکنوں سے خاموش رہنے کی اپیل کی اور کہا کہ وہ نعرے نہ لگائیں اور ایوان کے تقدس کو برقرار رکھیں مگر اس کے باوجود نعرے لگتے رہے۔

اسمبلی کا تقدس پامال نہ ہو  پانچ اپریل کے واقعہ کے بعد متحدہ نے دونوں فریقین سے بات کی اور پیپلز پارٹی سے کہا کہ اس طرح کا رویہ اختیار نہیں ہونا چاہیئے اجلاس سے قبل اسپیکر کے کمرے میں میٹنگ بھی ہوئی تھی۔جس میں یہ طے کیا گیا کہ ایسا کوئی عمل نہیں کیا جائیگا جس سے سندھ اسمبلی کا تقدس پامال ہو ایم کیو ایم کے رکن اسمبلی انور عالم

اس دوران سابق وزیراعلٰی ارباب غلام رحیم جیسے ہی پچھلے دروازے سے ایوان میں داخل ہوئے تو پیپلز پارٹی کے کارکن مشتعل ہوگئے ڈپلومیٹ گیلری سے ایک شخص نے ارباب رحیم کو گالی دیتے ہوئے جوتا کھینچ مارا جو ان کو سینے پر جالگا۔ اس دوران ایوان میں شدید شور و غل شروع ہوگیا جس میں سپیکر نے ان سے حلف لیا۔

روایت کے مطابق صوبائی اسمبلی کے نو منتخب ارکان، سپیکر کے ڈائس پر جا کر دستخط کرتے ہیں لیکن اس کے برعکس ارباب غلام رحیم کی نشست پر رجسٹرلے جا کر ان سے دستخط لیے گئے۔

دستخط کرنے کے فوراً بعد وہ ایوان سے باہر نکل گئے مگر مشتعل لوگوں نے جن میں خواتین بھی شامل تھیں، باہر بھی ان کا پیچھا نہ چھوڑا اور ایک کارکن نے دوبارہ ان کو جوتا مارا، وہ تیزی سے گاڑی میں سوار ہوئے اور اسمبلی سے باہر نکل گئے۔

متحدہ قومی موومنٹ کے ارکان نے ارباب غلام رحیم کے ساتھ پیش آنے والےواقعہ کی مذمت کی اور اجلاس سے بائیکاٹ کر کے چلے گئے۔ جس کے بعد اجلاس میں دس منٹ کا وقفہ کیا گیا جو ایک گھنٹے تک جاری رہا۔

	ارباب غلام رحیم کی نشست پر رجسٹرلے جا کر ان سے دستخط لیے گئے

ان کا کہنا تھا کہ پانچ اپریل سے یہ رویہ اختیار کیا گیا ہے، جس طرح سے اسمبلی کا تقدس پامال کیا گیا انہوں نے اسے تحمل سے برداشت کیا اور اسمبلی میں رہے۔

انہوں نے بتایا کہ پانچ اپریل کے واقعہ کے بعد متحدہ نے دونوں فریقین سے بات کی اور پیپلز پارٹی سے کہا کہ اس طرح کا رویہ اختیار نہیں ہونا چاہیئے اجلاس سے قبل اسپیکر کے کمرے میں میٹنگ بھی ہوئی تھی۔جس میں یہ طے کیا گیا کہ ایسا کوئی عمل نہیں کیا جائیگا جس سے سندھ اسمبلی کا تقدس پامال ہو۔

جوتا مارنے والا پرانا ملازم ایوان میں جس شخص نے جوتا مارا ہے وہ چار سال تک ارباب رحیم کا ملازم رہا ہے وہ پیپلز پارٹی کا پرانا کارکن نہیں ہے منظور وسان

ان کا کہنا تھا کہ متحدہ کی رابطہ کمیٹی کے اجلاس میں لائحہ عمل طے کیا جائے گا۔

پیپلز پارٹی کے رکن اسمبلی منظور وسان کا کہنا تھا کہ یہ واقعہ قابل مذمت ہے۔ پیپلز پارٹی ان واقعات کی ہرگز حمایت نہیں کرتی اس سے قبل جب حقیقی کے رکن یونس خان کے ساتھ اسی نوعیت کا واقعہ پیش آیا تھا تو اس کی بھی مذمت کی گئی تھی۔

ان کا کہنا تھا کہ ’ایوان میں جس شخص نے جوتا مارا ہے وہ چار سال تک ارباب رحیم کا ملازم تھا اوران کے ساتھ رہا ہے وہ پیپلز پارٹی کا پرانا کارکن نہیں ہے،
ہوسکتا ہے کہ کچھ سازشی عناصر کے ساتھ مل کر پیپلز پارٹی کو بدنام کرنے کی سازش کی گئی ہو۔ ایم کیو ایم کو جلد بازی نہیں کرنی چاہیئے تھی‘