’نئی پارلیمان کے سامنے سب سے اہم مسئلہ ججوں کی بحالی ہوگا‘

انہوں نے کہا کہ ایک جرنل کا حکم آئین نہیں بن سکتا اور غیر آئینی حکم کے خاتمے کے لیے ترمیم کی ضرورت نہیں۔

اعتزاز احسن نے سنیچر کی صبح بی بی سی اردو سروس سے بات کرتے ہوئے بارہ مئی کے واقعے کے بارے میں کراچی بار میں دیے گئے بیان کی وضاحت کرتے ہوئے کہا کہ ’بھول جانے سے مراد یہ نہیں ہے کہ احتساب نہیں ہونا چاہیے، قانون کی بالادستی نہیں ہونی چاہیے، مجرموں کو قانون کے حوالے نہیں کیا جانا چاہیے۔ میرا مطلب ہے کہ ایک چیز سے ’اوبسسڈ‘(obsessed) نہیں ہونا چاہیے، ہم نے اور کام بھی تو کرنے ہیں‘۔

پارلیمان بلانے میں تاخیر کیوں؟  ’پارلیمنٹ کو بلانے میں تاخیر کی جا رہی ہے، اصل میں تو اس وقت صدارتی عناصر ہیں ایوان صدر کے، وہ اور کچھ امریکی اور برطانوی اپنے تئیں مثبت نتائج نکالنے کی کوشش کر رہے ہیں اور یہی سنتے ہیں کہ صدارتی لوگ اور کچھ سفارتی لوگ ہانڈی پکانے کی کوشش کر رہے ہیں اعتزاز احسن

انہوں نے کہا کہ یہ جو پرویز مشرف کی عدلیہ ہے انہوں نے وہ توہین عدالت کا کیس ہی خارج کر دیا ہے، میں یہ نہیں کہتا کہ اس کو فراموش کر دیں۔ انہوں نے کہا کہ جن لوگوں نے چالیس پینتالیس لوگوں کو شہید کیا انہیں قانون کے آگے جوابدہ ہونا چاہیے۔

برطرف کیے گئے ججوں کی بحالی کے لیے وکلاء کی تحریک کے بارے میں ایک سوال کے جواب میں انہوں نے کہا کہ وہ کامیاب ہو گی۔ انہوں نے کہا کہ ’پارلیمنٹ کو بلانے میں تاخیر کی جا رہی ہے، اصل میں تو اس وقت صدارتی عناصر ہیں ایوان صدر کے، وہ اور کچھ امریکی اور برطانوی اپنے تئیں مثبت نتائج نکالنے کی کوشش کر رہے ہیں اور یہی سنتے ہیں کہ صدارتی لوگ اور کچھ سفارتی لوگ ہانڈی پکانے کی کوشش کر رہے ہیں‘۔

دو نومبر کی طرف واپسی  دو نومبر کو جو آئین تھا اس میں ترمیم صرف دو تہائی اکثریت سے پارلیمان کر سکتی تھی۔ ایک شخص تو نہیں کر سکتا تھا، جرنل مشرف نے کس طرح اس کو معطل کیا، کس طری اس میں ترمیم کی؟ کس طرح ججوں کو برطرف کیا؟ آئین کے تحت تو صرف سپریم جوڈیشل کونسل برطرف کر سکتی تھی۔ اس غیر آئینی کام کو واپس کرنے کے لیے آئین میں ترمیم کیا ضرورت ہے؟ اعتزاز احسن

اعتزاز احسن نے کہا کہ نئی پارلیمان کے سامنے سب سے اہم مسئلہ ججوں کی بحالی ہوگا۔ انہوں نے کہا کہ چیف جسٹس افتخار چودھری اور ان کے بچوں کے علاوہ سات ججوں کو گرفتار کر کے رکھا ہوا ہے۔

انہوں نے کہا کہ ججوں کی بحالی سیدھا سا معاملہ ہے۔ انہوں نے کہا کہ ایک غیر آئینی اقدام کو درست کرنے کے لیے کسی آئینی ترمیم کی ضرورت نہیں۔ انہوں نے کہا کہ جو آئینی ترمیم کی بات کرتا ہے وہ دراصل کہہ رہا کہ ’پرویز مشرف نے جو بھی جرم کیا وہ آئین کا حصہ بن گیا ہے‘۔

اعتزاز احسن نے ایک سوال کے جواب میں کہا کہ ججوں کی بحالی کے لیے آئینی ترمیم کی بات کرنا ایسا ہی کہ ایک چور سے گاڑی برآمد ہونے کے بعد سمجھا جائے کہ گاڑی چور کی ہے۔ انہوں نے کہا کہ آئین پر ڈاکہ پڑا ہے جس کے مالک عوام ہیں اور ان کی چیز ان کو واپس ملنی چاہیے۔ انہوں نے کہا کہ صدر مشرف خود اعتراف کر چکے ہیں کہ ان کا تین مارچ کا اقدام غیر آئینی ہے۔ انہوں نے کہا کہ جوں کی توں جو صورتحال ہے دو نومبر کی اس کو بحال کرنا کچھ دشوار نہیں۔

ججوں کی بحالی کے طریقۂ کار کے بارے میں ایک سوال کے جواب میں انہوں نے کہا کہ ’وہ بحال ہیں، وہ نکالے ہی نہیں گئے، آپ نے راہداری دینی ہے عدالت میں جانے کے لیے وہاں بیٹھنے کے لیے‘۔