عزیزاللہ خان بی بی سی اردو ڈاٹ کام، کوئٹہ

	ذوالفقار مگسی دو دفعہ پہلے وزیر اعلیٰ بلوچستان رہ چکے ہیں

گورنر ہاؤس کے ذرائع نے کہا ہے کہ نواب ذوالفقار مگسی بلوچستان کے اٹھارویں گورنر ہوں گے اور وہ جمعرات کو ساڑھے گیارہ بجےگورنر ہاؤس میں اپنے عہدے کا حلف اٹھائیں گے۔

نواب ذوالفقار مگسی حالیہ انتخابات میں رکن صوبائی اسمبلی منتخب ہوئے ہیں اور انہیں صوبے کی وزارت اعلٰی کا امیدوار بھی تصور کیا جا رہا تھا تاہم بقول ان کے وہ دو مرتبہ وزیر اعلی رہ چکے ہیں اس لیے تیسری مرتبہ وہ وزیراعلٰی نہیں بن سکتے۔ انہوں نے صحافیوں سے بات کرتے ہوئے کہا ہے کہ بلوچستان کے مسائل مذاکرات سے حل کیے جائیں گے۔

نواب ذوالفقار مگسی کو اویس احمد غنی کی جگہ بلوچستان کا گورنر بنایا گیا ہے۔ اویس احمد غنی کو جنوری کے پہلے ہفتے میں صوبہ سرحد کا گورنر مقرر کر دیا گیا تھا اور اس وقت سے بلوچستان ہائی کورٹ کے چیف جسٹس امان اللہ یاسین زئی قائم مقام گورنر کی ذمہ داریاں نبھا رہے تھے۔

ادھر پاکستان مسلم لیگ قائد اعظم کے قائدین تاحال پارلیمانی لیڈر کا انتخاب نہیں کر پائے ہیں جس وجہ سے مسلم لیگ کے اندر نومنتخب اراکین اسمبلی کوئی واضح فیصلہ نہیں کر پا رہے۔

دریں اثناء پیپلز پارٹی کے رہنما اور رکن صوبائی اسمبلی اسلم رئیسانی نے کہا ہے کہ ان کے پاس اکثریت ہے اور وہ بلوچستان میں ضرور حکومت بنائیں گے اور مسلم لیگ کے ان اراکین کو حکومت میں بالکل شامل نہیں کیا جائے گا جو بلوچستان میں مبینہ فوجی آپریشن میں شامل تھے۔