عزیزاللہ خان بی بی سی اردو ڈاٹ کام، کوئٹہ

	ایک رکن کی وفات اور خضدار میں دوبارہ گنتی سے آزاد امیدوار کی کامیابی سے ارکان کی تعداد سولہ رہ گئی ہے۔

پاکستان مسلم لیگ (ق) کے ایک رکن سرور کاکڑ کی وفات اور خضدار میں ایک حلقے میں دوبارہ گنتی سے آزاد امیدوار کی کامیابی کے بعد جماعت کے اراکین کی تعداد کم ہو کر سولہ رہ گئی ہے۔ کامیاب ہونے والے رکن آزاد حیثیت سے کامیاب ہوئے ہیں لیکن انہیں بلوچ قوم پرست جماعتوں کی حمایت حاصل ہے۔

حکومت سازی کے لیے مسلم لیگ (ق) اور پاکستان پیپلز پارٹی نے آزاد اور دیگر جماعتوں سے رابطے بڑھا دیے ہیں لیکن اب تک کچھ واضح صورتحال ابھر کر سامنے نہیں آرہی۔

مسلم لیگ (ق) سے تعلق رکھنے والے سابق ڈپٹی سپیکر اسلم بھوتانی نے کہا ہے کہ ان کی جماعت میں تمام کامیاب اراکین کا اپنا ووٹ بنک ہے اور یہ مسلم لیگ کا ووٹ نہیں ہے ۔

انہوں نے کہا کہ ان کی خواہش ہے کہ جماعت متحد رہے لیکن انہیں ایسا نظر نہیں آتا اور اگر مرکزی قیادت نے ان پر کسی کو وزیر اعلٰی کے طور پر مسلط کرنے کی کوشش کی تو مسلم لیگ قائم نہیں رہے گی اور سب سے پہلے مسلم لیگ چھوڑنے والے وہ خود ہوں گے۔

بھوتانی خاندان کے افراد مسلسل آٹھویں مرتبہ اپنے حلقہ دریجی سے کامیاب ہو رہے ہیں۔

سابق وزیر اعلٰی نواب ذولفقار مگسی اگرچہ آزاد حیثیت سے کامیاب ہوئے ہیں لیکن ایسی اطلاعات ہیں کہ انہوں نے بھی نومنتخب اراکین سے رابطے کیے ہیں۔

ادھر پاکستان پیپلز پارٹی کے صوبائی صدر حاجی لشکری ریئسانی نے کہا ہے کہ پیپلز پارٹی نے نواب اسلم رئیسانی کو پارلیمانی لیڈر نامزد کر دیا ہے اور اس پر ان جماعتوں یا اراکین کو کوئی اعتراض نہیں ہے جن سے حکومت سازی کے لیے مذاکرات کیے جا رہے ہیں۔

جمعیت علماء اسلام فضل الرحمان گروپ سابقہ دور میں مسلم لیگ (ق) کے ساتھ حکومت میں شامل تھی لیکن اس مرتبہ مبصرین کا کہنا ہے کہ جمعیت مسلم لیگ کے ساتھ حکومت سازی نہیں کرے گی کیونکہ ان انتخابات میں مسلم لیگ (ق) کے ساتھ حکومت سازی کا خمیازہ جمعیت کو بھی بھگتنا پڑا ہے۔