عبادالحق بی بی سی اردو ڈاٹ کام، لاہور

	لاہور ہائی کورٹ بار ایسوسی ایشن کی سو سالہ تاریخ میں پہلی بار کسی صدر نے اپنے حریف پر اتنی بڑی سبقت حاصل کی ہے

انور کمال نےاپنے مد مقابل پاکستان پیپلز پارٹی کے سینیٹر سردار لطیف احمد خان کھوسہ کے امیدوار اور پاکستان بار کونسل کے رکن پرویز عنایت ملک کو شکست دی۔

انور کمال لاہور ہائی کورٹ بار ایسوسی ایشن کی سو سالہ تاریخ میں پہلے صدر ہیں جنہوں نے اپنے مد مقابل امیدوار پر دو ہزار چار سو انتالیس ووٹوں سے برتری حاصل کی ہے۔ نومنتخب صدر کو سپریم کورٹ بار کے نظر بند صدر اعتزاز احسن کی بھی حمایت حاصل تھی۔

انور کمال نے تین ہزار پانچ سو سات ووٹ حاصل کیے جب کہ ان کے مدمقابل پرویز عنایت ملک کو ایک ہزار اڑسٹھ ووٹ ملے۔

لاہور ہائی کورٹ بار ایسوسی ایشن کے سیکرٹری کے عہدے پر مسلم لیگ نواز کے نو منتخب رکن پنجاب اسمبلی کے رانا مشہود احمد خان کے بھائی رانا اسد اللہ خان بھی بھاری اکثریت سے کامیاب ہوئے۔

بار کی نائب صدارت پر میاں اسلم اور فنانس سیکرٹری کے عہدے پر سیدہ فیروزہ رباب منتحب ہوئیں۔

یہ وکلاء تحریک کی کامیابی ہے  یہ میری نہیں بلکہ وکلاء تحریک کی کامیابی ہے اور یہ معزول ججوں کی بحالی تک جاری رہے گی

لاہور ہائی کورٹ بار کے سالانہ انتخابات کے لیے پنجاب بھر سے وکلاء نے اپنے حقِ رائے دہی استعمال کیا۔

نومنتخب صدر انور کمال نے اپنے خطاب میں کہا کہ یہ ان کی نہیں بلکہ وکلاء تحریک کی کامیابی ہے۔انہوں نے اعلان کیا کہ وکلاء کی تحریک معزول ججوں کی بحالی تک جاری رہے گی۔

خیال رہے کہ گزشتہ برس پیپلز پارٹی کے سینیٹر لطیف کھوسہ گروپ کے امیدوار احسن بھون بھاری اکثریت سے ہائی کورٹ بار کے صدر کامیاب ہوئے تھے تاہم احسن بھون وکلاء تحریک کے دوران اپنے عہدے کی معیاد ختم ہونے سے پہلے ہی لاہور ہائی کورٹ کے ایڈیشنل جج بن گئے۔