عبادالحق بی بی سی اردو ڈاٹ کام، لاہور

	شہباز شریف کو اسی مقدمے کی وجہ سے نا اہل قرار دیا گیا تھا

یہ درخواست مدعی سعید الدین کی جانب سے ان کی وکیل آفتاب باجوہ ایڈووکیٹ کے توسط سے دائر کی گئی تھی جس میں موقف اختیار کیا گیا کہ شہباز شریف مقدمہ کی تفتیش کے وقت ملک میں نہیں تھے اور اسی وجہ سے شامل تفتیش نہیں ہوسکے اس لیے ان کو شامل تفتیس کیا جائے اور اس مقصد کے لیے تفتیشی ٹیم تشکیل دی جائے۔

عدالت کے روبرو شہباز شریف کے وکیل خواجہ حارث نے اس درخواست کی مخالفت کی اور کہا کہ مقدمہ کا چالان عدالت میں پیش کیا جاچکا ہے اور جب ایک مرتبہ مقدمے کا چالان عدالت میں پیش کردیا جائے تو مقدمے کا دوسراچالان پیش نہیں کیا جاسکتا۔

وکیل صفائی کا کہنا ہے کہ شہباز شریف کے خلاف کوئی ٹھوس شہادت نہیں ہے اور ان کو سیاسی عناد کی بنیاد پر اس مقدمہ میں ملوث کیا گیا ہے۔

عدالت نے فریقین کے وکلاء کے دلائل سننے کے بعد شہبازشریف سے ازسر نو تفتیش کے لیے درخواست کو مسترد کردیا۔

عدالت نے شہباز شریف کی اس مقدمہ سے بریت کے لیے درخواست پر کارروائی کے لیے سولہ فروری کی تاریخ مقرر کی ہے۔ آئندہ سماعت وکلاء بریت کی درخواست پر دلائل دیں گے۔

شہباز شریف پر یہ مقدمہ سنہ انیس سو اٹھانوے میں ان کی وزارتِ اعٰلی کے دور میں ایک مبینہ جعلی پولیس مقابلے میں پانچ نوجوانوں کی ہلاکت کے قریباً تین برس بعد سنہ دو ہزار ایک میں لاہور ہائی کورٹ کے حکم پر درج ہوا تھا اور اس کے مدعی ہلاک شدگان میں سے ایک کے والد سعید الدین ہیں۔

مقدمے کی سماعت کے دوران سنہ دو ہزار تین میں عدالت کے سامنے پیش نہ ہونے پر شہباز شریف کو مفرور قرار دیتے ہوئے ان کے دائمی وارنٹ گرفتاری جاری کیےگئے تھے۔تاہم شہباز شریف کے بیرونِ ملک ہونے کی وجہ سے انہیں گرفتار نہیں کیا جا سکا تھا۔

پچیس نومبر کو پاکستان آمد کے بعد مدعی سعید الدین نے عدالت میں دوبارہ درخواست دی تھی جس میں کہا گیا تھا کہ اب جبکہ شہباز شریف پاکستان میں ہیں تو پولیس انہیں کیوں گرفتار نہیں کر رہی۔

اس پر عدالت نے پولیس حکام کو نوٹس جاری کیے تھے۔وطن واپسی کے بعد شہباز شریف نے عدالت کے سامنے پیش ہو کر خود کو عدالت کے حوالے کر دیا تھا۔