احمد رضا بی بی سی اردو ڈاٹ کام، کراچی

	رانا بھگوان داس نے وکلاء کو احتجاجی تحریک جاری رکھنے کو کہا تھا

گزشتہ ایک ماہ میں یہ دوسرا موقع ہے کہ وکلاء کے کسی اجتماع سے خطاب کے بعد انہیں گھر میں محبوس کیا گیا ہے۔

رانا بھگوان داس کی اہلیہ نے بی بی سی کو بتایا کہ رانا بھگوان داس نے شام پانچ بجے کی فلائٹ سے اسلام آباد روانہ ہونا تھا لیکن سہ پہر تین بجے کے قریب ان کےگھر کے باہر پولیس تعینات کر دی گئی جس نے انہیں اسلام آباد جانے سے روک دیا۔

ان کا کہنا تھا کہ’ہم نے تو ان کا سامان بھی گاڑی میں رکھ دیا تھا لیکن پولیس نے جانے سے منع کر دیا۔ انہوں نے کہا کہ اوپر سے آرڈر ہے اور ہم مجبور ہیں۔‘

تاہم سیکرٹری داخلہ حکومت سندھ عارف احمد خان کا کہنا ہے کہ رانا بھگوان داس کو نظر بند نہیں کیا گیا ہے اور ان کی اپنی حفاظت کے لیے انہیں شہر سے باہر جانے سے روکا گیا ہے۔

رانا بھگوان داس کو نظربند نہیں کیا گیا ہے اور ان کی اپنی حفاظت کے لئے انہیں شہر سے باہر جانے سے روکا گیا ہے۔ سیکرٹری داخلہ سندھ عارف احمد خان

ان کا کہنا ہے کہ ’اس وقت ملک میں ہر جگہ ایسے حالات ہیں کہ ہم نہیں چاہتے کہ وہ یہاں (کراچی) سے کہیں جائیں البتہ کراچی میں نقل و حرکت کرنے کی انہیں مکمل اجازت ہے۔ وہ ملک کی ایک مشہور شخصیت ہیں اور ہم نہیں چاہتے ہیں کہ انہیں کسی مشکل صورتحال کا سامنا ہو‘۔

یاد رہے کہ سپریم کورٹ کے معزول چیف جسٹس افتخار محمد چوہدری کی بحالی کے لیے سندھ ہائی کورٹ بار ایسوسی ایشن کی کال پر جمعرات کو وکلاء نے یوم افتخار منایا اور ریلی نکالی تھی۔ اس ریلی سے رانا بھگوان داس نے خطاب کرتے ہوئے وکلاء کو احتجاجی تحریک جاری رکھنے کو کہا تھا۔ انہوں نے کہا ’معزول ججز بحال ہوں گے اور خلافِ آئین اقدامات اٹھانے والے اور ان کا ساتھ دینے والے انہی عدالتوں میں پیش ہوں گے‘۔