رفعت اللہ اورکزئي بی بی سی اردو ڈاٹ کام ،پشاور

	مقامی طالبان نےاس حملے کی ذمہ داری قبول کی ہے

ادھر شورش زدہ ضلع سوات میں مقامی عسکریت پسندوں نے مبینہ طورپر امریکہ کے لیے جاسوسی کے الزام میں ایک پولیس اہلکار کوگلا کاٹ کر ہلاک کیا ہے۔

تحریک طالبان پاکستان نے دونوں واقعات کی ذمہ داری قبول کرلی ہے اور
حملے میں چار اہلکاروں کی ہلاکت کا دعوٰی کیا ہے۔

اورکزئی ایجنسی سے ملنے والی اطلاعات میں سرکاری ذرائع کے مطابق یہ واقعہ سنیچر کی رات نو بجے کے قریب اورکزئی ایجنسی کے صدر مقام غلجو میں پیش آیا۔

ایک سرکاری اہلکار نے بی بی سی کو بتایا کہ کچھ مسلح افراد نے رات کی تاریکی میں غلجو بازار کے قریب واقع لیوی کی ایک چیک پوسٹ پر خودکار ہتھیاروں سے حملہ کیا جس سے وہاں موجود تین لیوی اہلکار ہلاک جبکہ دو زخمی ہوگئے۔

ہلاک ہونے والے اہلکاروں کا تعلق علی خیل، ربیعہ خیل اور ملاخیل قبیلوں سے بتایا جاتا ہے۔

مقامی لوگوں کا کہنا کہ چند دن قبل مقامی عسکریت پسندوں نے علاقے میں تعینات تمام لیوی اہلکاروں کو خبردار کیا تھا کہ وہ سرکاری نوکری چھوڑ کر اسلحہ مقامی انتظامیہ کے حوالے کر دیں۔

اورکزئی ایجنسی کی پڑوسی ملک افغانستان سے سرحد نہ ملنے کی وجہ سے عام طورپر یہ ایک پرامن علاقہ سمجھا جاتا ہے۔ تاہم لیوی پوسٹ پر حالیہ حملہ علاقے میں اپنی نوعیت کا پہلہ واقعہ ہے

مقامی لوگوں کے مطابق صدر مقام غلجو میں تعینات پولیٹکل تحصیلدار اور ان کا عملہ دو دن پہلے ہی علاقہ چھوڑ کر جاچکے ہیں۔ اورکزئی ایجنسی کی پڑوسی ملک افغانستان سے سرحد نہ ملنے کی وجہ سے عام طورپر یہ ایک پرامن علاقہ سمجھا جاتا ہے۔ تاہم لیوی پوسٹ پر حالیہ حملہ علاقے میں اپنی نوعیت کا پہلہ واقعہ ہے۔

اس سے پہلے بھی علاقے میں عسکریت پسندوں کے سرگرمیوں کی اطلاعات ملتی رہی ہیں تاہم جب سے عسکریت پسندوں نے پاکستان کی سطح پر تنظیم بنانے کا اعلان کیا ہے اس کے بعد سے ملک کے تمام قبائلی علاقوں میں شدت پسندوں کی سرگرمیاں کھول کر سامنے آئی ہیں۔

ادھر صوبہ سرحد کے شورش زدہ ضلع سوات سے اطلاعات میں سرکاری ذرائع نے بتایا کہ گلی باغ کے علاقے سے ایک پولیس اہلکار کی لاش ملی ہے جس کو گلہ کاٹ کر قتل کیا گیا ہے۔ مقامی لوگوں کا کہنا ہے کہ لاش کے ساتھ ایک خط بھی ملا ہے جس میں لکھا ہے کہ دشمنوں کےلیے جو جاسوسی کرے گا اس کا یہی انجام ہوگا۔

تحریک طالبان پاکستان کے ترجمان مولوی عمر نے کسی نامعلوم مقام سے بی بی سی کو ٹیلی فون کرکے اس قتل کی ذمہ داری قبول کی اور کہا کہ مقتول میاں قیوم شاہ ایک پولیس اہلکار تھا جو ان کے مطابق امریکہ کےلیے مبینہ طورپر جاسوسی کرنے میں ملوث تھا۔