عزیزاللہ خان بی بی سی اردو ڈاٹ کام، کوئٹہ

	کوئٹہ شہر میں یوٹیلٹی سٹورز پر قطاریں معمول بنتی جا رہی ہیں۔

کوئٹہ شہر کے مختلف مقامات پر یوٹیلٹی سٹورز اور سڑکوں پر کھڑے ٹرکوں کے پیچھے لوگوں کی قطاریں معمول بنتی جا رہی ہیں جہاں سے محدود پیمانے پر لوگوں کو سرکاری قیمت پر آٹا مل جاتا ہے۔

مہینے کے شروع کے دنوں میں جب لوگوں کو تنخواہیں مل جاتی ہیں تو کریانہ مرچنٹس کے پاس لوگوں کا رش بڑھ جاتا ہے۔ ان لوگوں کا کہنا ہے کہ وہ مہنگائی کا کیا رونا روئیں گے اب تو حالت یہ ہے کہ صرف آٹا مل جائے تو روکھی سوکھی کھا کر بھی گزارا کر لیں گے۔

منڈی میں آٹا پچیس سے چھبیس روپے کلو سے تجاوز کر چکا ہے اور بیس کلو کا تھیلہ اب پانچ سو اور ساڑھے پانچ سو روپے میں فروخت ہو رہا ہے۔

حکومت کا کہنا ہے کہ پیچھے سے کم گندم آرہی ہے۔ محکمہ خوراک کے حکام کے مطابق اس وقت کوئٹہ شہر میں ایک سو تیس فیئر پرائس شاپ اور تیس خصوصی مقامات پر سرکاری نرخوں پر آٹا فراہم کیا جا رہا ہے۔

آٹے کے ایک خریدار نے قطار میں کھڑے ہوئے کہا یہاں آٹا تو سرکاری نرخ پر مل جاتا ہے لیکن وقت کا ضیاع ہوتا ہے۔

اگرچہ نگراں وزیر اعلٰی محمد صالح بھوتانی نے حکام کو ہدایت کی ہے کہ گرانفروشوں اور ذخیرہ اندوزوں کے خلاف سخت کارروائی کی جائے لیکن شہر میں اس قسم کی کوئی کارروائی نظر نہیں آرہی۔