ارمان صابر بی بی سی اردو ڈاٹ کام، کراچی

	پاکستان میں آٹے کا بحران سنگین صورتِ حال اختیار کرتا جا رہا ہے

کراچی پریس کلب میں پیر کی سہ پہر کراچی آٹا چکی ایسوسی ایشن کے عہدیداران نے ایک پریس کانفرنس میں الزام لگایا کہ حکومت رعایتی قیمت میں گندم کی غیر منصفانہ تقسیم کر رہی ہے۔ انہوں نے کہا کہ فلور ملوں کو سوا بارہ روپے کلو گندم فراہم کی جا رہی ہے جبکہ اکثریتی چکی مالکان کو گندم اوپن مارکیٹ سے بیس روپے میں خریدنا پڑ رہی ہے اور وہ آٹا چوبیس روپے کلو فروخت کرنے پر مجبور ہیں۔

ان کا کہنا ہے کہ اگر حکومت انہیں بھی رعایتی داموں گندم مہیّا کرے تو وہ چوبیس کے بجائے سولہ روپے کلو آٹا فروخت کرنے کے لیے تیار ہیں۔

ایسوسی ایشن کے سیکریٹری جنرل محمد انیس شاہد نے کہا کہ یہاں کوئی نظام نہیں ہے اور بحران پر قابو پانے کے لیے ایک نظام بنانے کی ضرورت ہے۔

کراچی میں اسی سے سو فلور مل ہیں جن میں سے چند گندم کی عدم دستیابی کی وجہ سے بند ہو چکی ہیں۔ دوسری جانب کراچی میں تقریباً تین ہزار چکیاں کام کر رہی ہیں اور ان میں سے محض ایک سو بیس حکومت کے پاس رجسٹرڈ ہیں اور ان ہی کو حکومت کی جانب سے سوا بارہ روپے کلو کے حساب سے گندم مل رہی ہے۔

انیس شاہد نے کہا کہ ان کا ایک ہی مطالبہ ہے کہ گندم کی تقسیم کے عمل کو منصفانہ بنایا جائے۔ انہوں نے کہا کہ اوپن مارکیٹ سے چکی والے بیس روپے میں گندم خریدتے ہیں اور چار روپے پسائی اور مزدوری کی لاگت کے بعد چوبیس روپے میں فروخت کرتے ہیں۔ حکومت چکی والوں کو ہی مہنگا آٹا فروخت کرنے کے الزام میں جرمانے عائد کرتی ہے جبکہ جو بیوپاری بیس روپے میں گندم فروخت کرتے ہیں ان کے خلاف کوئی کارروائی نہیں کی جاتی۔