ہارون رشید بی بی سی اردو ڈاٹ کام، اسلام آباد

	پوری پاکستانی قوم دکھ کی اس گھڑی میں بھٹو خاندان کے ساتھ ہے

صدر مملکت نے آصف علی زرداری سے ٹیلی فون پر بات چیت کرتے ہوئے کہا کہ اس المناک حادثہ پر انہیں گہرا دکھ پہنچا ہے۔ تاہم حکومت نے واقعہ کی تحقیقات کیلیے ایک خصوصی ٹیم مقرر کر دی ہے تاکہ اس کارروائی میں ملوث ملزمان کو انصاف کے کٹہرے میں لایا جا سکے۔

صدر مملکت نے آصف زرداری سے کہا کہ وہ اور پوری پاکستانی قوم دکھ کی اس گھڑی میں ان کے ساتھ کھڑے ہیں۔

مخدوم امین فہیم سے بات چیت کرتے ہوئے صدر مملکت نے محترمہ بے نظیر بھٹو کے دہشت گرد حملے میں ہلاک ہونے پر تعزیت کا اظہار کرتے ہوئے کہا کہ حکومت دہشت گردی ختم کرنے کیلیے پر عزم ہے۔

انہوں نے پیپلز پارٹی کے کارکنوں اور رہنماؤں سے اپیل کی کہ وہ دکھ کی گھڑی میں صبر اور حوصلے کا مظاہرہ کریں۔ ادھر بے نظیر بھٹو کا سوئم اتوار کے دن نوڈیرو میں تین بجے سہ پہر ہوگا۔

اسلام آباد میں پارٹی کے مرکزی دفتر میں تعزیتی کتاب بھی رکھ دی گئی ہے۔ کل رات امریکی سفیر این ڈبلیو پیٹرسن نے دورہ کیا اور کتاب میں اپنے جذبات کا اظہار کیا۔ فرانس، جنوبی کوریا اور دیگر ممالک کے سفارت کاروں نے بھی کتاب میں تعزیتی پیغامات درج کیے ہیں۔