احمدرضا بی بی سی اردو ڈاٹ کام، کراچی

	سینکڑوں گاڑیوں کو کراچی میں جلا دیا گیا

دوسری جانب ملک کی سرکاری ایئرلائن پی آئی اے اور تمام نجی ایئرلائنز نے اندرون ملک چلنے والی تمام پروازیں بھی معطل کردی ہیں۔

بینظیر بھٹو کے قتل کے ردعمل میں اندرون سندھ مشتعل لوگوں نے کم سے کم سات ریلوے اسٹیشنوں کو نذر آتش کیا ہے جن میں شکارپور، جیکب آباد، جنگ شاہی، جھمپیر، کوٹری، سندھ یونیورسٹی جامشورو، بھان سید آباد اور ٹنڈوآدم ریلوے اسٹیشنز شامل ہیں۔

اسکے علاوہ کوٹری، نوڈیرو، ٹنڈوجام، روہڑی اورگھوٹکی ریلوے اسٹیشنوں پر کھڑی کم سے کم نو ٹرینوں اور روہڑی ریلوے اسٹیشن پر انکوائری اور بکنگ آفس کو آگ لگائی گئی ہے جبکہ بعض مقامات پر پٹڑیاں بھی اکھاڑی لی گئی ہیں جس کے بعد ملک بھر میں ٹرینوں کی آمدورفت معطل ہے اور ٹرینوں کے مسافر مختلف علاقوں میں پھنس کر رہ گئے ہیں۔

	کراچی میں جا بجا جلی ہوئی گاڑیاں نظر آ رہی ہیں

’ہمارے انفرااسٹرکچر کو نقصان پہنچا ہے اور کئی اسٹیشنز جل گئے ہیں ہم پہلے تمام پلوں اور ٹریک (پٹڑی) کو چیک کریں گے اور جب تک ان کی مرمت نہیں ہوجاتی ٹرینیں بند رہیں گی۔‘

انہوں نے کہا کہ ابھی اس بارے میں کچھ نہیں کہا جاسکتا کہ ریلوے ٹریفک کب تک بحال ہوجائے گا۔ ”اس میں مہینے تو نہیں لیکن کئی دن لگ سکتے ہیں۔،ت

دوسری جانب گزشتہ روز ہونے والے جلاؤ گھیراؤ اور ہنگامہ آرائی کے بعد کراچی اور اندرون سندھ میں مرکزی شاہراہوں پر سینکڑوں گاڑیاں بھی نذر آتش کی گئی تھیں۔ اندرون ملک کے چلنے والے بسوں کی آمدورفت بھی معطل ہے اور ٹرانسپورٹرز کے مطابق جو بسیں اندرون ملک سفر کررہی تھیں ان میں مشتعل لوگوں سے بچ جانے والی گاڑیوں کو بھی حفاظت کے پیش نظر مختلف مقامات پر روک لیا گیا تھا جس کے باعث ان میں سوار مسافروں کی بڑی تعداد راستوں میں پھنسی ہوئی ہے۔ ان کا کہنا ہے کہ حالات معمول پر آنے کے بعد ہی ٹرانسپورٹ سروس بحال کی جائے گی۔