انتخاب امیر
بی بی سی اردو ڈاٹ کام، پشاور |  |
| | | پی پی پی پاکستان کی سب سے زیادہ مقبول جماعت ہے: بینظیر |
سابق وزیر اعظم اور پاکستان پیپلز پارٹی کی سربراہ بے نظیر بھٹو نے کہا ہے کہ ’خوف کی حکمرانی‘ اور ’عوام کی غلامی‘ قائم رکھنے کے لیے عوام دشمن قوتیں نہیں چاہتیں کہ عوام کو طاقت ملے اور وہ حاکم بنیں۔ بدھ کو پشاور کے ارباب نیاز کرکٹ اسٹیڈیم میں عوامی جلسہ سے خطاب کرتے ہوئے انہوں نے کہا کہ عوام دشمن قوتیں نہیں چاہتیں کہ عوام ملک کے حاکم بنیں اس لیے بار بار جمہوری حکومتوں کو ہٹا کر غیرجمہوری حکومتیں مسلط کی گئیں۔ پشاور میں کیبل آپریٹر کی دکان کے باہر بدھ کی علی الصبح ہونے والے بم دھماکے اور اس عید الاضحیٰ کے پہلے روز صوبہ سرحد کے ضلع چارسدہ کے گاؤں شیرپاؤ کی ایک مسجد میں ہونے والے خودکش بم حملے کا ذکر کرتے ہوئے انہوں نے کہا: ’بم دھماکے ایک سازش ہیں تاکہ لوگوں کو غلام بنایا جائے۔‘ ارباب نیاز کرکٹ اسٹیڈیم کے اردگرد غیرمعمولی حفاظتی انتظامات کیے گئے تھے۔ اسٹیڈیم کو جانے والی تمام سڑکوں کو صبح ہی سے آمدورفت کے لیے بند کردیا گیا تھا جبکہ اردگرد بازار بھی بند کرائے گئے تھے۔ اسٹیڈیم کے اندر داخل ہونے کے لیے متعدد حفاظتی دروازے (واک تھرو گیٹ) نصب کیے گئے تھے اور بین الاقوامی معیار کے کرکٹ گراؤنڈ کے اندر اور باہر بڑی تعداد میں پولیس اور فرنٹیئر کانسٹیبلری کے اہلکار تعینات کیے گئے تھے۔ پیپلز پارٹی کے جلسہ میں حاضرین کی تعداد منتظمین کی توقعات سے کہیں کم رہی۔ گراؤنڈ میں ہزاروں کی تعداد میں کرسیوں کا بندوبست کیا گیا تھا تاہم کرسیوں کی بہت بڑی تعداد خالی پڑے رہنے پر پارٹی سربراہ بے نظیر بھٹو کی تقریر سے پہلے خالی کرسیوں کو الٹا کر دیا گیا۔ جلسہ میں کم حاضری کا ذکر کیے بغیر بے نظیر بھٹو کا کہنا تھا کہ ’ماضی میں جلسہ شہر کے اندر کیا کرتے تھے لیکن اس دفعہ شہر سے دور کرنا پڑا جہاں شہریوں کا پہنچنا مشکل تھا۔‘ یاد رہے کہ ارباب نیاز کرکٹ اسٹیڈیم شہر کے اندر ہی واقع ہے۔ |  ملک تب ہی مضبوط ہوگا جب عوام کا پیٹ خالی نہ ہو، استحصال سے پاک معاشرہ ہو جس میں امید اور ترقی کی روشنی ہو اور خوف کے اندھیرے چھٹ جائیں۔  بینظیر بھٹو |
اُنہوں نے کہا کہ ملک میں بعض سیاسی جماعتیں ایک صوبے کو دوسرے صوبے سے لڑاتی ہیں اور بعض ایک فقہ کے لوگوں کو دوسرے فقہ سے۔ ’ لیکن پی پی پی کا پیغام گولی کا نہیں بلکہ امن اور یکجہتی کا پیغام ہے۔‘ اُنہوں نے کہا کہ ملک تب ہی مضبوط ہوگا جب عوام کا پیٹ خالی نہ ہو، استحصال سے پاک معاشرہ ہو جس میں امید اور ترقی کی روشنی ہو اور خوف کے اندھیرے چھٹ جائیں۔ نام لیے بغیر بعض بین الاقوامی اداروں کا حوالہ دیتے ہوئے انہوں نے کہا کہ اُن کی معلومات کے مطابق پی پی پی پاکستان کی سب سے زیادہ مقبول جماعت ہے جبکہ پاکستان مسلم لیگ (نواز) دوسری بڑی مقبول جماعت ہے۔ انہوں نے کہا کہ میں آج پشاور آئی ہوں اور میاں نواز شریف کل یہاں آئیں گے۔ ہم دونوں کا یہی مطالبہ ہے کہ ملک میں منصفانہ انتخابات ہوں تاکہ ہمارے امیدوار اسمبلیوں میں پہنچ سکیں، قانون سازی کرسکیں اور قائدِ اعظم کی خواب کے مطابق اس ملک کی عوام کو آزادی اور عزت کے ساتھ زندگی گزارنے کا حق مل سکے۔ اُن کا کہنا تھا کہ پی پی پی امن میں یقین رکھتی ہے اس لیے اس کے دورِ حکومت میں کوئی جنگ نہیں ہوئی۔ جنرل یٰحیٰٰ کے وقت مشرقی پاکستان ہم سے علیحدہ ہوا تب بھی پی پی پی اقتدار میں نہیں تھی، جنرل ضیاء کے زمانے میں سیاچین گلیشیئر سے ہاتھ دھونے پڑے تب بھی پی پی پی حکومت میں نہیں تھی۔ اور کارگل کی جنگ کے دوران بھی ہم حکومت میں نہ تھے اور اب جبکہ لڑائی ہو رہی ہے ہم اب بھی حکومت میں نہیں۔ بینظیر بھٹو نے کہا کہ پی پی پی اپنے دورِ حکومت میں عوام کی ترقی پر توجہ مرکوز کرتی ہے اور اُن کے حقوق اور آزادی کی پاسداری کرتی ہے۔ اسی لیے پیپلز پارٹی کے زمانے میں نہ تو طلباء تنظیموں پر اور نہ ہی مزدور یونینوں پر پابندی عائد کی جاتی ہے۔ | 
باجوڑ: قبائل اور حکومت میں معاہدہ
