رفعت اللہ اورکزئی بی بی سی اردو ڈاٹ کام، سوات

	ایف سی کیمپ سے فائرنگ میں بھاری ہتھیار استعمال کیے گئے

پاکستان کی فوج کے ترجمان میجر جنرل وحید ارشد نے شدت پسندوں کے ٹھکانوں پر بمباری کی تصدیق کی ہے تاہم ان کے مطابق ہلاک یا زخمی ہونے کی مصدقہ اطلاعات نہیں ہیں۔

جبکہ سیدو شریف کے ائرپورٹ سے سکیورٹی کی طرف سے شدت پسندوں کے ٹھکانوں پر گولہ باری کا سلسلہ جاری ہے اور فضا میں گن شپ ہیلی کاپڑ بھی پرواز کر رہے ہیں۔

ہمارے نمائندے کا کہنا ہے ک کانجو اور دم غار میں شہری آبادی پر بمباری کی وجہ سے گھروں اور دو سکولوں کو بھی نقصان پہنچا ہے۔

اس سے قبل پیر اور منگل کی درمیانی شب فائرنگ سے ایک بچے سمیت دو افراد ہلاک ہوئے ہیں۔

مقامی طالبان کے ٹھکانوں پر یہ فائرنگ سوات کے علاقے کانجو میں واقع ایف سی کے کیمپ سے کی جا رہی ہے۔

طالبان قبضہ برقرار  سوات کے تین تحصیلوں خوازہ خیلہ، مٹہ اور کبل کے کچھ علاقوں پر طالبان کا قبضہ بدستور برقرار ہے اور وہاں پر قائم تقریباً تمام پولیس تھانوں پر عسکریت پسندوں کا کنٹرول بتایا جاتا ہے۔ کچھ علاقوں میں سڑکوں پر قائم چیک پوسٹوں پر طالبان بھاری اور ہلکے ہتھیاروں کے ساتھ موجود ہیں

دریں اثناء سوات میں مقامی طالبان کے ترجمان سراج الدین نے کہا ہے کہ فوجی آپریشن کی صورت میں وہ بھرپور مقابلہ کریں گے۔ ان کا کہنا تھا کہ اگر وہ لڑائی میں فوج کا مقابلہ نہ کر سکے تو گوریلا کارروائیاں کریں گے۔

مقامی صحافی شیرین زادہ کانجو کے مطابق جن علاقوں کے لوگ نقل مکانی کے بعد اپنے گھروں کو واپس واپس آئے تھے وہاں پیر کی بمباری کے بعد لوگ دوبارہ محفوظ مقامات کی طرف منتقل ہونے کی سوچ رہے ہیں۔ تازہ بمباری سے علاقے میں ایک بار پھر سخت خوف وہراس پھیل گیا ہے۔

دوسری طرف سوات کے تین تحصیلوں خوازہ خیلہ، مٹہ اور کبل کے کچھ علاقوں پر طالبان کا قبضہ بدستور برقرار ہے اور وہاں پر قائم تقریباً تمام پولیس تھانوں پر عسکریت پسندوں کا کنٹرول بتایا جاتا ہے۔ عینی شاہدین کے مطابق مسلح افراد چار باغ، گلی باغ، خوازہ خیلہ، مٹہ اور کبل کے کچھ علاقوں میں سڑکوں پر قائم چیک پوسٹوں پر بھاری اور ہلکے ہتھیاروں کے ساتھ موجود ہیں۔

سوات میں تقریباً تین ہفتے قبل سکیورٹی فورسز کے ڈھائی ہزار اہلکاروں کی تعیناتی کے بعد مذہبی رہنما مولانا فضل اللہ کے حامیوں اور سرکاری فورسز کے مابین شدید جھڑپیں شروع ہوئی تھیں۔