ہارون رشید بی بی سی اردو ڈاٹ کام، اسلام آباد

	پی سی او کے تحت حلف اٹھانے والوں کی تعداد اب گیارہ ہو گئی ہے

عبوری آئینی حکم نامے کے تحت حلف لینے والوں میں لاہور ہائی کورٹ کے سابق جج جسٹس ریٹائرڈ محمد اختر شبیر اور سندھ ہائی کورٹ کے سابق جج جسٹس ریٹائرڈ ضیاء پرویز شامل ہیں۔

ان سے حلف چیف جسٹس عبدالحمید ڈوگر نے سپریم کورٹ میں منعقد ایک تقریب میں لیا۔ اس موقع پر اٹارنی جنرل ملک محمد قیوم بھی موجود تھے۔

اس نئی پیش رفت کے بعد سپریم کورٹ نے نئی کاز لسٹ بھی جاری کر دی ہے۔

توقع ہے کہ نئے ججوں کے آنے کے بعد جنرل پرویز مشرف کے صدارتی کاغذات نامزدگی کی منظوری کے خلاف آئینی درخواستوں کی سماعت ہوسکے گی۔ ان درخواستوں کی سماعت گیارہ رکنی بنچ ہی کر رہا تھا۔

ادھر سرکاری ذرائع کے مطابق جسٹس ریٹائرڈ جاوید اقبال آج توقع ہے کہ کوئٹہ سے اسلام آباد اپنی نئی ذمہ داری سنبھالنے کے لیے پہنچ رہے ہیں۔ انہیں حکومت نے عبوری آئینی حکم نامے کے تحت حلف نہ اٹھانے کے بعد دس نومبر کو پاکستان پریس کونسل کا چئرمین مقرر کیا تھا۔

سرکاری ذرائع کے مطابق انہیں اس عہدے پر تین برسوں کے لیے تعینات کیا گیا ہے اور اس دوران سپریم کورٹ کے جج کے برابر کی تنخواہ اور دیگر مراعات کے مستحق ہوں گے۔

لوگوں نے معزول جسٹس جاوید اقبال کو گزشتہ دنوں کوئٹہ میں بغیر کسی پروٹوکول کے گھومتے دیکھا ہے۔ تاہم وہ ابھی تک میڈیا سے اپنے آپ کو دور رکھنے میں کامیاب رہے ہیں۔

ادھر لاہور ہائی کورٹ کے دو نئے ججوں نے بھی آج پی سی او کے تحت حلف اٹھا لیا ہے۔ نئے جج جسٹس میاں نجم الزماں اور جسٹس مولوی انوارلحق ہیں۔ملک میں ہنگامی حالت کے نفاذ کے وقت ہائی کورٹ میں ججوں کی تعداد اکتیس تھی۔ دو مزید ججوں کے حلف اٹھانے سے پی سی او والے ججوں کی تعداد بیس ہوگئی ہے۔