عبادالحق بی بی سی اردوڈاٹ کام، لاہور

	جہانگیر بدر کا رہن سہن ان کے ذرائع آمدن سے مطابقت نہیں رکھتا: نیب

قومی احتساب بیورو(نیب) نے جہانگیر بدر کے خلاف سنہ دو ہزار ایک میں بدعنوانی کے الزامات میں دو مختلف ریفرنس لاہور کی احتساب عدالت میں دائر کیے تھے۔

ایک ریفرنس میں نیب نےالزام عائد کیا تھا کہ جہانگیر بدر نے سنہ انیس سو اٹھاسی سے سنہ انیس سو نوے کےدوران وزیر پٹرولیم کی حیثیت سے اختیارات کا ناجائز استعمال کرتے ہوئے لوگوں کو سرکاری ملازمتیں دیں۔ دوسرے ریفرنس میں کہا گیا ہے کہ جہانگیر بدر کا رہن سہن ان کے ذرائع آمدن سے مطابقت نہیں رکھتا۔

جہانگیر بدر نے اپنے خلاف ریفرنس کی سماعت کرنے والی احتساب عدالتوں کے روبرو درخواست کی ہے جس میں کہا گیا ہے کہ ’صدر جنرل پرویز مشرف کی جانب سے جاری ہونے والے قومی مفاہمتی آرڈیننس کی دفعہ سات کے تحت درخواست گزار کے خلاف زیر سماعت ریفرنس قانونی طور پر غیرموثر ہوگئے ہیں۔‘

درخواست میں یہ بھی کہا گیا کہ صدارتی آرڈیننس کے اجرا کے بعد اب احتساب عدالت کو جہانگیر بدر کے خلاف زیر سماعت ریفرنسوں پر کارروائی کا اختیار نہیں رہا۔

دیگر درخواست گزار  بینظیر بھٹو کے سابق پرنسپل سیکرٹری احمد صادق اور سابق چیئر مین واپڈا لیفٹیننٹ جنرل ریٹایرڈ زاہد علی اکبر نے قومی مفاہمتی آرڈیننس کی بنیاد پر اپنےخلاف بدعنوانی کے الزام میں دائر الگ الگ ریفرنس کے اخراج کے لیے احتساب عدالت سے رجوع کررکھا ہے

واضح رہے کہ صدر جنرل پرویز مشرف نے پیپلز پارٹی کے ساتھ بات چیت کے بعد پانچ اکتوبر کی شب قومی مفاہمتی آرڈیننس سنہ دو ہزار سات جاری کیا تھا۔ اس آرڈیننس کے تحت ارکان اسمبلی اور ہولڈرز آف پبلک آفس کے خلاف احتساب عدالت میں زیر سماعت ایسے ریفرنس خارج ہوسکیں گے جو یکم جنوری سنہ انیس سوچھیاسی سے بارہ اکتوبر انیس سو ننانوے کے دوران عدالتوں میں دائر کیے گئے تھے۔

اس آرڈیننس کے تحت بینظیر بھٹو کے سابق پرنسپل سیکرٹری احمد صادق اور سابق کور کمانڈر اورسابق چیئرمین واپڈا لیفٹیننٹ جنرل ریٹایرڈ زاہد علی اکبر نے قومی مفاہمتی آرڈیننس کی بنیاد پر اپنےخلاف بدعنوانی کے الزام میں دائر الگ الگ ریفرنس کے اخراج کے لیے احتساب عدالت سے رجوع کر رکھا ہے۔

ادھر سپریم کورٹ نے قومی مفاہمتی آرڈیننس کو کالعدم قرار دلوانے کے لیے دائر ایک ہی نوعیت کی درخواستوں پر حکومت کو نوٹس جاری کر رکھے ہیں۔