بیورو رپورٹ بی بی سی اردو ڈاٹ کام، اسلام آباد

	لال مسجد پر فوجی کارروائی میں سو سے زیادہ افراد ہلاک ہو گئِے تھے

لال مسجد جولائی میں فوجی کارروائی کے بعد سے مسلسل بند تھی۔ فوجی کارروائی میں مسجد کے نائب خطیب مولانا عبدالرشید غازی اور گیارہ فوجیوں سمیت سو سے زائد افراد ہلاک ہو گئے تھے۔

اسلام آباد کی انتظامیہ نے جب مسجد کو تعمیرو مرمت کے بعد جولائی کے آخری ہفتے میں دوبارہ کھولا تو جامعہ فریدیہ کے طلباء نے مسجد کا کنٹرول سنبھال لیا تھا جس کے بعد مسجد کو دوبارہ سیل کر کے پولیس کا پہرہ بٹھا دیا گیا تھا۔

فوجی کارروائی کے بعد لال مسجد کی صفائی اور آرائش کے دوران اس کی دیواروں اور میناروں پر سفیدی مائل رنگ کر دیا گیا تھا اور مسجد کے باہر لال مسجد کی جگہ مرکزی جامعہ مسجد جی سِکس کا بورڈ لگا دیا گیا تھا۔

تاہم منگل کو سپریم کورٹ کے ایک دو رکنی بینچ نے اسلام آباد کی انتظامیہ کو حکم دیا ہے کہ لال مسجد کو بدھ سےدوبارہ کھول دیا جائے۔

عدالت نے کیپیٹل ڈویلپمنٹ اتھارٹی کو بھی حکم دیا تھا کہ ایک سال کی مدت میں منہدم کیے گئے جامعہ حفصہ کی جگہ ایک مدرسہ تعمیر کیا جائے۔ عدالت نے جامعہ فریدیہ کے مہتمم مولانا عبدالغفار کو عارضی طور پر لال مسجد کا خطیب مقرر کیا تھا جبکہ مولانا عبدالعزیز کے بھتیجے عامر صدیق کو نائب خطیب مقرر کیا گیا۔

عدالتی فیصلے کے مطابق فوجی کارروائی کے دوران لاپتہ ہونے والے چار افراد کے رشتہ داروں نے آبپارہ تھانہ میں نامعلوم افراد کے خلاف اغواء کے مقدمے درج کرائے ہیں۔