حالیہ ہفتوں میں اسامہ بن لادن کے نام سے جاری ہونے والا یہ تیسرا بیان ہے

اسلام آباد میں بی بی سی کے نامہ نگار نے بتایا کہ حالیہ ہفتوں میں اسامہ بن لادن کے نام سے جاری ہونے والی یہ تیسری ٹیپ ہے جس سے معلوم ہوتا ہے کہ وہ اب بھی با اثر ہیں۔ اسامہ بن لادن سے منسوب بیان کا مین امریکہ میں دہشت گردی کے امور کی ماہر لارا مینزفیلڈ نے جاری کی۔ مینزفیلڈ انٹرنیٹ پر شدت پسندوں کی کارروائیوں پر نظر رکھتی ہیں۔

نئی آڈیو ٹیپ میں پاکستانی سکیورٹی حکام کی جانب سے لال مسجد کے خلاف کارروائی کی مذمت کی گئی ہے اور کہا گیا ہے کہ اس کا بدلہ لیا جائے گا۔

پاکستانی حکام نے اس ٹیپ کے جواب میں کہا ہے کہ ان کو اپنا کام کرنے سے نہیں روکا جا سکتا اور وہ ’دہشتگردوں کا تعاقب جاری رکھیں گے‘۔

بیان میں کہا گیا ہے کہ ’جو بھی اپنی مرضی سے اور جانتے بوجھتے پرویز مشرف کی مدد کرے گا وہ بھی ان کی طرح کافر ہو جائے گا‘۔

اسامہ بن لادن سے منسوب بیان میں اس سے پہلے بھی مشرف حکومت کا تختہ الٹنے کا مطالبہ کیا جا چکا ہے۔

اسامہ بن لادن کے نام سے جاری ہونے والےاس بیان سے پہلے ہی مبینہ طور پر طالبان کے حمایتی شدت پسندوں کی جانب سے تشدد کے واقعات میں اضافہ ہو چکا ہے۔ پاکستان کے قبائلی علاقوں اور شمال مغربی سرحدی صوبے میں سرکاری اہلکاروں کا اغوا اور خودکش حملے معمول بنتے جا رہے ہیں۔