انتخاب امیر بی بی سی اردو ڈاٹ کام، اسلام آباد

عوام سڑکوں پر نکلنے کے بجائے گھروں میں بیٹھ کر حزبِ مخالف کے جلسے اور جلوسوں کا تماشہ ٹیلی ویژن چینلز پر دیکھتے ہیں قاضی حسین احمد

آل پارٹیز ڈیموکریٹک موومنٹ (اے پی ڈی ایم) کے اسلام آباد سمیت دیگر شہروں میں جمعہ کو صدر جنرل پرویز مشرف کے خلاف مظاہروں میں عوام کی عدم دلچسپی اتحاد میں شامل جماعتوں کے لیے اس قدر لمحہِ فکریہ تھی کہ جماعت ِ اسلامی کے سربراہ قاضی حسین احمد نے وفاقی دارالحکومت میں اکھٹے ہونے والے چند سو مظاہرین سے کہا کہ عوام کی عدم دلچسپی حکومت کی سازش ہے۔

اسلام آباد میں سپریم کورٹ کی عمارت کے سامنے ہونے والے مظاہرے کی قیادت جماعتِ اسلامی کے سربراہ قاضی حسین احمد، پاکستان مسلم لیگ (ن) کے قائم مقام صدر مخدوم جاوید ہاشمی اور تحریک ِانصاف کے سربراہ عمران خان نے کی لیکن ان رہنماؤں کی موجودگی کے باوجود مظاہرین کی تعداد چند سو سے زائد نہ تھی۔

لاہور، کراچی، پشاور اور کوئٹہ میں ہونے والے مظاہروں کا احوال بھی اسلام آباد کے مظاہرے سے مختلف نہ تھا جہاں بی بی سی کے نامہ نگاروں کے مطابق اے پی ڈی ایم میں شامل جماعتوں کے صوبائی رہنماؤں نے شرکت کی لیکن مظاہرین کی تعداد ہر جگہ سینکڑوں میں تھی۔

وفاقی دارالحکومت میں مظاہرین سے خطاب کرتے ہوئے قاضی حسین احمد نے عوامی عدم دلچسپی کو سازش قرار دیتے ہوئے کہا کہ’عوام سڑکوں پر نکلنے کے بجائے گھروں میں بیٹھ کر حزبِ مخالف کے جلسے اور جلوسوں کا تماشہ ٹیلی ویژن چینلز پر دیکھتے ہیں‘۔

اس حوالے سے اُنہوں نے کہا کہ ’ کہیں کامران خان شو تو کہیں طلعت حسین شو ہے، کہیں حامد میر شو ہے تو کہیں ڈاکٹر شاہد مسعود شو ہے، ہم سڑکوں پر آنسوگیس اور ڈنڈے کھاتے ہیں اور قوم گھروں میں بیٹھ کر تماشہ دیکھتی ہے، یہ سازش ہے‘ ۔

اُن کا کہنا تھا کہ عوام کو سڑکوں پر نکلنا ہوگا تاکہ جنرل پرویز مشرف کے ’غیر آئینی اور غیر قانونی ‘ اقدامات کا راستہ روکا جا سکے۔

اسلام آباد میں سپریم کورٹ کی عمارت کے سامنے منعقد ہونے والے مظاہرے کی قیادت قاضی حسین احمد، مخدوم جاوید ہاشمی اور عمران خان نے کی لیکن ان رہنماؤں کی موجودگی کے باوجود مظاہرین کی تعداد چند سو سے زائد نہ تھی

جُمعہ کی سہ پہر اے پی ڈی ایم کے سربراہی اجلاس کے بعد ایک پریس کانفرنس کے دوران پاکستان مسلم لیگ (ن) کے چیئرمین راجہ ظفر الحق نے انتیس ستمبر کو آل پارٹیز ڈیموکریٹک موومنٹ کے ارکانِ اسمبلی کے اسمبلیوں سے مستعفی ہونے کا اعلان کرتے ہوئے کہا کہ اتحاد میں شامل جماعتیں تیس ستمبر سے روزانہ کی بنیاد پر صدر جنرل پرویز مشرف کے آئندہ صدارتی انتخاب میں حصہ لینے کے خلاف ملک بھر میں مظاہرے کریں گی۔

انہوں نےاس حوالے سے کچھ نہیں بتایاکہ ان مظاہروں میں عوام کی شرکت کو یقینی بنانے اور اتحاد کے مطلوبہ نتائج حاصل کرنے کے لیے کیا حکمتِ عملی اختیار کی جائے گی۔