انتخاب امیر بی بی سی اردو ڈاٹ کام، اسلام آباد

	اختر خان کانجو نے اپنے فیصلے کا اعلان ایک پریس کانفرنس کے دوران کیا

اپنی سیاسی وفاداری تبدیل کرنے کا اعلان انہوں نے جمعرات کو پی ایم ایل (ن) کے قائم مقام صدر مخدوم جاوید ہاشمی اور چودھری نثار علی خان کے ہمراہ مسلم لیگ کے مرکزی دفتر میں پریس کانفرنس کے دوران کیا۔

چودھری نثار نے اختر خان کانجو کی مسلم لیگ (ن) میں شمولیت کو اہم قرار دیتے ہوئے کہا کہ گزشتہ چند روز میں حکمراں جماعت کے چوتھے رکنِ اسمبلی نے اُن کی جماعت میں شمولیت اختیار کی ہے۔ ان کے مطابق اس سے پہلے شیخوپورہ سے بلال ورک، ملتان سے علی گیلانی اور خاتون رُکن شہزادی ٹوانہ حکمراں جماعت چھوڑ کر مسلم لیگ (ن) میں شامل ہوئیں۔

مخدوم جاوید ہاشمی نے دعویٰ کیا کہ آنے والے دنوں میں حکمراں جماعت سے تعلق رکھنے والے مزید اراکینِ اسمبلی مسلم لیگ (ن) میں شمولیت کریں گے۔

جب اُن کو یاد دلایا گیا کہ ان کے رہنما نواز شریف نے کہا تھا کہ مسلم لیگ (ن) کو چھوڑ کر جانے والوں کو دوبارہ شامل نہیں کیا جائے گا، تو مخدوم جاوید ہاشمی نے کہا اُن کی جماعت نے حکمتِ عملی مرتب کی ہے جس کے تحت اُن لوگوں کو پارٹی میں واپس لے لیا جائے گا جو جنرل پرویز مشرف کی آمریت کے خلاف اُٹھ کھڑے ہونے کو تیار ہیں اور جو آئندہ صدارتی انتخاب میں جنرل مشرف کے امیدوار ہونے کی صورت میں اُہھیں ووٹ نہیں دینےدیں گے ۔

اختر خان کانجو مسلم لیگ نواز کے سابق رہنما صدیق خان کانجو کے قریبی رشتہ دار ہیں۔ وہ ڈھائی سال پہلے پنجاب کے ضلع لودھراں سے مسلم لیگ (ق) کے ٹکٹ پر قومی اسمبلی کے رُکن منتخب ہوئے اور بعد میں حکمراں جماعت کے رہنما چودھری شجاعت اور چودھری پرویز الٰہی سے اختلاف کی بنیاد پر جنوبی پنجاب سے تعلق رکھنے والے چند دوسرے اراکینِ اسمبلی کے ساتھ مل کر انہوں نے حکمراں جماعت میں فاروڈ بلاک بنایا۔

پریس کانفرنس میں انہوں نے دعویٰ کیا کہ وہ بغیر کسی شرط کے مسلم لیگ (ن) میں شامل ہوئے ہیں کیونکہ اُن کے خیال میں جنرل مشرف وردی میں صدارتی انتخاب لڑنے کے اہل نہیں ہیں۔

سابق وزیرِ اعظم نواز شریف کی وطن واپسی کے حوالے سے پوچھے گئے ایک سوال کے جواب میں مخدوم جاوید ہاشمی نے کہا کہ اگر نواز شریف اور شہباز شریف کو گرفتار کیا گیا تو ملک بھر سے اس کے خلاف ردِعمل سامنے آئے گا جس کے لیے، اُن کے مطابق، اُن کی پارٹی نے حکمتِ عملی مرتب کی ہوئی ہے۔