علی سلمان بی بی سی اردو ڈاٹ کام، لاہور

	رٹ میں پنجاب حکومت اور پولیس کےافسروں کو فریق بنایا ہے

مسلم لیگ نون کے رہنماؤں کا کہنا ہے کہ چند روز کے دوران ان کے درجنوں کارکنوں کوگرفتار کیا گیا ہے اور دیگر کو حراساں کیا جارہاہے۔

گرفتاریوں کےخلاف مسلم لیگ نون کے صوبائی صدر ذوالفقار کھوسہ اور رکن قومی اسمبلی خواجہ سعد رفیق نے لاہور ہائی کورٹ میں ایک رٹ دائر کی ہے۔

مسلم لیگی رہنماؤں کے وکیل نصیر بھٹہ نے بی بی سی کو بتایا کہ انہوں نے رٹ میں پنجاب حکومت اور پولیس افسروں کو فریق بنایا ہے۔

رٹ میں کہا گیا ہے کہ پنجاب بھر میں سیاسی بنیادوں پر مسلم لیگی کارکنوں کو گرفتار اور حراساں کیا جارہا ہے۔ مسلم لیگی وکیل کے بقول یہ سپریم کورٹ کے اس فیصلے کی خلاف ورزی ہے جس کے تحت حکام کونوازشریف کی پاکستان واپسی کے عمل میں کسی قسم کی رکاوٹ ڈالنے سے منع کیا گیاہے۔

نصیر بھٹہ ایڈووکیٹ نے اپنے دلائل میں سپریم کورٹ کے تئیس اگست کے فیصلے کا حوالےدیتے ہوئے کہا کہ آئین کےمطابق حکومت اس بات کی پابند ہے کہ وہ سپریم کورٹ کے احکامات نافذ کرے تاہم ان کے بقول حکومت پنجاب ان احکامات کی خلاف ورزی کرکے توہین عدالت کی مرتکب ہورہی ہے۔

کارکن ابھی تحمل کا مظاہرہ کررہے ہیں کیونکہ وہ حکومت کو ایمرجنسی یا مارشل لاء لگانے کا کوئی جواز فراہم نہیں کرنا چاہتے تاہم ان کا کہنا تھا کہ حکومتی کارروائیاں کارکنوں کی برداشت سے باہر بھی ہوسکتی ہیں مسلم لیگ نون کے صوبائی نائب صدراعجاز احمد حفیظ

رٹ میں عدالت سے استدعا کی گئی ہے کہ حکومت کو ہدایت کی جائے کہ وہ مسلم لیگی کارکنوں کو حراساں نہ کرے اور انہیں سیاسی سرگرمیوں سے نہ روکا جائے اور جن کارکنوں کوگرفتار کیا گیا ہے انہیں رہا کیا جائے۔

رٹ میں یہ بھی کہا گیا ہے کہ جن حکام نے سپریم کورٹ کے احکامات کی خلاف ورزی کی ہے ان کے خلاف توہین عدالت کی کارروائی کی جائے۔

اس رٹ کے ساتھ گرفتار مسلم لیگیوں کے ناموں کی فہرست بھی ہائی کورٹ کو فراہم کی گئی ہے ۔ مسلم لیگی وکلاء نے عدالت کو بتایا کہ جیسے جیسے انہیں مزید گرفتاریوں کی اطلاعات ملیں گی وہ اس فہرست میں اضافہ کرتے جائیں گے۔

ہائی کورٹ کے جج جسٹس زاہد حسین نے ایڈووکیٹ جنرل کو ہدایت کی ہے کہ وہ جمعہ کو شق وار جواب داخل کریں اور اس دوران گرفتار مسلم لیگیوں سے ان کے اہل خانہ کو ملنے دیا جائے۔

دریں اثناء مسلم لیگ کے چند صوبائی عہدیداروں نے لاہور پریس کلب میں ایک ہنگامی پریس کانفرنس میں بتایا کہ اب تک ان کے دوسو سے زائد کارکنوں کو حراست میں لیا جاچکا ہے اور پولیس انہیں خوفزدہ کرنے کے لیے گھروں پر چھاپے مار رہی ہےاور چاردیواری کا تقدس پامال کیا جارہاہے۔

مسلم لیگ نون کے صوبائی نائب صدراعجاز احمد حفیظ نے کہا کہ کارکن ابھی تحمل کا مظاہرہ کررہے ہیں کیونکہ وہ حکومت کو ایمرجنسی یا مارشل لاء لگانے کا کوئی جواز فراہم نہیں کرنا چاہتے تاہم ان کا کہنا تھا کہ حکومتی کارروائیاں کارکنوں کی برداشت سے باہر بھی ہوسکتی ہیں۔