انتخاب امیر بی بی سی اُردو ڈاٹ کام ، اسلام آباد

	حکومت معاملے کے حل کے لیے قبائلی عمائدین سے بات چیت کر رہی ہے

وزارتِ خارجہ کی ترجُمان تسنیم اسلم نے ہفتہ وار پریس کانفرنس کے دوران ایک سوال کے جواب میں کہا کہ حکومتِ پاکستان نے شمالی وزیرستان میں پچھلے سال ستمبر میں کیےگئے معاہدے کو تاحال ترک نہیں کیا ہے۔

اتوار کو شمالی وزیرستان کے صدر مقام میران شاہ میں مقامی طالبان کی جانب سے حکومت کے ساتھ کیے گۓ معاہدے کی منسوخی کا اعلان کیا گیا تھا۔ طالبان کا کہنا ہے کہ حکومت نے اُن کے ساتھ کیے گۓ امن معاہدے کی بعض شقوں پر عملدرآمد نہیں کیا جبکہ پچھلے سال ستمبر سے لے کر آج تک حکومت کا موقف رہا ہے کہ امن معاہدہ قبائلی عمائدین سے کیا گیا ہے نہ کہ مقامی طالبان سے۔

پیر کو پریس کانفرنس کے دوران بھی حکومتی ترجُمان کا یہی کہنا تھا کہ اب جبکہ امن معاہدے کی منسوخی کا اعلان کر دیا گیا ہے تو حکومت معاملے کا حل ڈھونڈنے کے لیے قبائلی عمائدین سے بات چیت کر رہی ہے۔

البتہ اُن کا کہنا تھا کہ موجودہ بات چیت کے بارے میں صوبہ سرحد کے گورنر زیادہ بہتر انداز میں کچھ کہہ سکیں گے کیونکہ وہ حکومت کی جانب سے مرکزی شخصیت ہیں۔

تسنیم اسلم نے کہا کہ حکومت نے قبائلی علاقوں میں مسائل کے حل کے لیے ایک جامع حکمتِ عملی اپنائی ہوئی ہے جس کے تحت سیاسی و معاشی انداز اختیار کرنے کے ساتھ ساتھ جہاں ضروری ہو وہاں فوجی کارروائی بھی کی جاتی ہے۔اُنہوں نے کہا کہ حکومت کی شروع سے یہی حکمتِ عملی رہی ہے اور ابھی تک اسی کو جاری رکھا گیا ہے۔

بھارتی وزیرِاعظم منموہن سنگھ کے حالیہ بیان کہ جس میں اُنہوں نے کہا تھا کہ کشمیر میں فائر بندی کی لکیر امن کی لکیر میں تبدیل ہو جائےگی، تسنیم اسلم کا کہنا تھا کہ معمول سے ہٹ کر مسئلہ کشمیر کا کوئی بھی ایسا حل جو کہ کشمیری عوام کی اُمنگوں کے مطابق ہو وہ کشمیر میں لائن آف کنٹرول کو غیر اہم بنا دے گا۔ اس سے پہلے ترجُمان نے کہا کہ بھارتی وزیرِاعظم نے اس بات کو تسلیم کیا ہے کہ فریقین کشمیر کے معاملے پر سنجیدہ بات چیت کر رہے ہیں۔