دلاور خان وزیر، عبدالحئی کاکڑ بی بی سی اردو ڈاٹ کام

	حال ہی میں قبائل کے جوانوں کو سکیورٹی دستوں میں بھرتی کیا گیا ہے

ادھرصوبائی حکومت کا کہنا ہے کہ لال مسجد آپریشن کے بعد ممکنہ ردعمل سے نمٹنے کے لیے اس کی درخواست پر ٹانک اور سوات کے علاوہ دیگر جنوبی اضلاع میں بھی فوج کے اضافی دستوں کو تعینات کر دیا گیا ہے۔

ٹانک پولیس کے سربراہ ممتاز زرین نے بی بی سی کو بتایا کہ پنجاب رجمنٹ کی ایک بریگیڈ ٹانک پہنچنا شروع ہوگئی ہے۔ان کے مطابق یہ عمل چند دنوں میں مکمل ہو جائے گا۔ انہوں نے کہا کہ ان فوجیوں کو ٹانک کے مختلف علاقوں ٹانک شہر، منزائی، کوڑ قلعہ، اور مرتضیٰ میں تعینات کرنے کا منصوبہ ہے۔

پولیس سربراہ نے کہا کہ ایک بریگیڈ میں چار ہزار جوان ہوں گے اور اس کے علاوہ علاقے میں خیبر رائفل کے پانچ سو لوگ بھی تعنیات کیے گیے ہیں جو فوج کے ساتھ ساتھ کام کریں گے۔

ممتاز زرین کے مطابق حال ہی میں ضلع ٹانک سے محسود، برکی اور بھٹنی قبائل سے تعلق رکھنے والے چھ سو جوانوں کی بھرتی کی گئی ہیں جن میں تین سو سکاؤٹس فورس اور تین سو ملیشیا میں رکھے گئے ہیں۔ان کے مطابق ان چھ سو اہلکاروں کو چھ مہینے کی ٹریننگ دی جائے گی اور پھر انہیں ٹانک، منزائی، کوڑ قلعہ اور مرتضیٰ میں تعینات کیا جائے گا۔

	لال مسجد آپریشن کے بعد صوبائی حکومت کو صوبے کے بعض اضلاع میں شدید ردعمل کا خدشہ تھا

ٹانک میں فوج کو ایک ایسے موقع پر تعینات کیا گیا ہے جب نہ صرف ٹانک بلکہ ڈیرہ اسماعیل خان، لکی مروت اور بنوں میں حالات انتہائی کشیدہ ہیں اور ٹانک سے متصل قبائلی علاقے جنوبی وزیرستان اور شمالی وزیرستان میں بھی حالات ایک بار پھر خراب ہوتے دِکھائی دے رہے ہیں۔

امن معاہدہ صرف زبانی معاہدہ ہو کر رہ گیا ہے اور اس کے نکات کی خلاف ورزی ہو چکی ہے۔ تاہم حکومت اور مقامی طالبان ایک دوسرے پر امن معاہدے کی خلاف ورزی کے الزامات لگاتے رہتے ہیں۔

دیگرجنوبی اضلاع میں بھی تعیناتی
ادھر جمعہ کو بی بی سی سے بات چیت کرتے ہوئے صوبائی وزیر اطلاعات آصف اقبال داؤدزئی کا کہنا تھا کہ لال مسجد کی خلاف حکومتی آپریشن کے بعد صوبائی حکومت کو صوبے کے بعض اضلاع میں شدید ردعمل کا خدشہ تھا اسی لیے کسی بھی ناخوشگوار واقعےسے نمٹنے کے لیے فوج کو طلب کرنے کی درخواست کی گئی۔

	مبینہ شرپسند وں کی جانب سے سی ڈی فلمیں فروخت کرنے والی دکانوں کو نشانہ بنایا جا رہا ہے

آصف اقبال داؤد زئی کا مزید کہنا تھا کہ ’مرکزی حکومت نے وزیراعلیٰ اکرم خان درانی کے مطالبے پر صوبہ سرحد میں امن و امان برقرار رکھنے کے لیے چار ارب بیس کروڑ روپے کا ایک مجموعی پیکیج دیا ہے ۔‘

ان کے مطابق صوبائی حکومت کے مطالبے کے تحت مرکزی حکومت کی جانب سے لیے گئے اقدامات میں پولیس فورس کی تعداد بڑھانا اور انہیں چھ ہزار بندوقیں فراہم کرنا، صوبہ سرحد کے دیگر صوبوں میں تعینات پولیس کانسٹبلری کی چھیالیس پلاٹونوں کو واپس صوبے کے حوالے کرنا اور صوبائی حکومت کی درخواست پر فوج کو حرکت میں لانا شامل ہیں۔

صوبہ سرحد کے جنوبی اضلاع اور سوات میں فوج کی بڑی تعداد میں تعیناتی سے متعلق وہاں پر فوجی آپریشن شروع کرنے کی اطلاعات کی تردید کرتے ہوئے انہوں نےکہا کہ ’صوبائی حکومت جب لال مسجد کے مسئلے کو مذاکرات کے ذریعے حل کرنے کی کوششوں میں عملاً شامل رہی ہے تو پھر یہ کیسے ممکن ہے کہ ہم اپنے ہی صوبے کے اندر فوجی آپریشن شروع کریں۔،

ماضی میں صوبہ سرحد کی حکومت یہ شکایت کرتی تھی کہ صوبے میں امن و امان کو برقرار رکھنے میں مرکزی حکومت اسے کوئی بھی تعاون فراہم نہیں کر رہی ہے تاہم اب ایسا معلوم ہو رہا ہے کہ صوبائی اور مرکزی حکومت مشترکہ اقدامات پرمتفق ہوگئی ہیں

ذرائع کے مطابق گزشتہ دو دنوں کے دوران صوبہ سرحد کے جنوبی اضلاع ٹانک، ڈیرہ اسماعیل خان، بنوں اور لکی مروت میں تقریباً بارہ ہزار مزید فوجیوں کو تعینات کیا گیا۔

واضح رہے کہ ماضی میں صوبہ سرحد کی حکومت یہ شکایت کرتی تھی کہ صوبے میں امن و امان کو برقرار رکھنے میں مرکزی حکومت اسے کوئی بھی تعاون فراہم نہیں کررہی ہے تاہم اب ایسا معلوم ہورہا ہے کہ صوبے میں طالبانائزیشن سے نمٹنے کے لیے صوبائی اور مرکزی حکومتیں مشترکہ طور پر اقدامات کرنے پر متفق ہوگئی ہیں۔