دلاور خان وزیر بی بی سی اردو ڈاٹ کام، ڈی آئی خان

	شدت پسندوں کے ٹھکانوں کی نشاندہی کے بعد فوج آپریشن کرے گی

جمعرات کے روز شہر میں کرفیو نافذ کردیا گیا ہے۔

ٹانک پولیس کے سربراہ ممتاز زرین نے بی بی سی کو بتایا کہ چونتیس ہیوی آرٹلری ریجمنٹ کا ایک دستہ جمعرات کی صبح ٹانک پہنچ گیا ہے، لیکن ابھی تک آپریشن کرنے کا فیصلہ نہیں کیا گیا ہے۔

انہوں نے کہا کہ مشکوک ٹھکانوں کی نشاندہی ہونے پر ان علاقوں میں آپریشن کیا جا سکتا ہے۔ ان کا کہنا تھا کہ ٹانک کے بعض علاقوں میں شدت پسند موجود ہیں۔

قبائلی علاقے جنوبی وزیرستان سے ملحقہ صوبہ سرحد کے شہر ٹانک میں مارچ سے بم دھماکوں اور پولیس پر حملوں میں اضافہ دیکھنے کو آیا ہے۔ پچھلے ایک ہفتہ سے ٹانک میں نامعلوم لوگوں اور سکیورٹی فورسز کے مابین باقاعدہ جنگ چِھڑی ہوئی ہے۔

بدھ کو پولیس کی ایک چوکی پر نامعلوم افراد نے دستی بم پھینکا تھا، جس کے نتیجے میں شروع ہونے والے فائرنگ کے تبادلے میں چھ افراد ہلاک اور متعدد پولیس اہلکاروں سمیت اٹھارہ افراد زخمی ہوئے تھے۔

حملہ آوروں کی فائرنگ کے بعد شہر کا مرکزی بازار بند کر دیا گیا تھا۔ ڈیرہ اسماعیل خان کے ڈی آئی جی پولیس ذوالفقار چیمہ نے بتایا تھا کہ حملہ آوروں نے راکٹوں، میزائیلوں اور چھوٹی توپوں کا استعمال بھی کیا۔