عزیزاللہ خان بی بی سی اردو ڈاٹ کام کوئٹہ

	بلوچستان کے سیلاب میں ایک اندازے کے مطابق مالی نقصاں زلزلے سے زیادہ ہوا ہے

بلوچستان رقبے کے حوالے سے پاکستان کا چوالیس فیصد حصہ ہے اور پچیس جون کے بعد طوفان پھر بارشیں اور سیلاب سے پندرہ اضلاع بری طرح متاثر ہوئے ہیں، جہاں ایک اندازے کے مطابق ڈیڑھ لاکھ لوگ بے گھر ہو گئے ہیں، ہزاروں مکانات منہدم یا پانی میں بہہ گئے ہیں، فصلیں تباہ ہو گئی ہیں، مال داری ختم اور ٹیوب ویل نہیں رہے، کھلے آسمان تلے لوگ مدد مدد پکار رہے ہیں۔

وزیر اعلی بلوچستان جام محمد یوسف کے مطابق یہ اسی ارب روپے سے زیادہ کا نقصان ہے۔ انہوں نے کہا تھا کہ صرف انہوں نےہی نہیں بلکہ فوجی حکام نے بھی کہا ہے کہ بلوچستان میں اگرچہ جانی نقصان کم ہوا ہو لیکن مالی اعتبار سے نقصان کشمیر اور سرحد کے زلزلے سے کم نہیں بلکہ زیادہ ہے۔

صدرجنرل پرویز مشرف نے بھی اسے بڑا نقصان قرار دیا لیکن بلوچستان میں دورہ تو سیلاب سے متاثرہ علاقوں کا کر رہے تھے لیکن جواب وہ لال مسجد کے بارے میں ہی دے رہے تھے۔ انھوں نے کہا تھا کہ لال مسجد والے اسلحہ پھینک دیں ورنہ مارے جائیں گے۔

	صدر مشرف نے سیلاب زدہ علاقے کا فضائی دورہ کیا

سیلاب سے متاثرہ علاقوں میں لوگ تاحال امداد کے منتظر ہیں اور ان کا کہنا ہے کہ میڈیا کے ذریعے ہی ان کی آواز ارباب اختیار تک پہنچ سکتی ہے۔

بلوچستان اسمبلی میں قائد حزب اختلاف کچکول علی ایڈووکیٹ کا کہنا ہے کہ حکومت نے جان بوجھ کر لال مسجد کا ڈرامہ رچایا ہے تاکہ سیلاب سے متاثرہ علاقوں اور دیگر تحریکوں کو دبایا جا سکے۔

کوئٹہ میں عام لوگوں کا کہنا ہے کہ بلوچستان کے لوگ تو لال مسجد کے واقعہ میں ڈوب گئے ہیں۔ بلوچوں اور پشتونوں کا کوئی پرسان حال نہیں ہے۔

مبصرین کا کہنا ہے کہ سیلاب تو قدرتی آفت ہے کہیں بھی کسی وقت آسکتی ہے اس میں حکومت کا تو کوئی عمل دخل نہیں ہے لیکن ہاں یہ ضرور ہے کہ حکومت غافل رہی ہے۔

مبصرین کے مطابق طوفان سے پہلے محکمہ موسمیات نے خبردار کر دیا تھا لیکن کوئی احتیاطی اقدمات نہیں کیے گئے اور اب بلوچستان کے لیے بین الاقوامی ڈونر کانفرنس طلب نہ کرنے سے یہی مطلب لیا جا سکتا ہے کہ حکومت نہیں چاہتی کہ بین الاقوامی امدادی تنظیمیں ان متاثرہ علاقوں کا دورہ کریں۔