ریاض سہیل بی بی سی اردو ڈاٹ کام، کراچی

	’لوگوں کو صرف راشن پہنچایا جائے اور گھر بنانے کے لئے لکڑی اور پینے کا پانی فراہم کیا جائے۔‘

کراچی پریس کلب میں جمعرات کو ایک پریس کانفرنس میں انہوں نے کہا کہ اس مشکل کی گھڑی میں ہر شہری کو اپنا فرض ادا کرنا چاہیے اور وہ فنکاروں اور اداکاروں سے رابطہ کر رہے ہیں کہ وہ بھی بارش زدگان کی مدد کریں۔

انہوں نے کہا کہ اگر حکومت انہیں ٹرین فراہم کرے تو وہ پورے ملک کا چکر لگائیں گے اور انہیں امید ہے کہ لوگ انہیں مایوس نہیں کریں گے۔ انہوں نے کہا کہ لوگ امداد دینے کے لئے تیار ہوتے ہیں مگر ٹرانسپورٹ کا مسئلہ ہونے کی وجہ سے وہ یہ پہنچا نہیں سکتے اور جب تمام سڑکیں ٹوٹ چکی ہیں ایسے میں ٹرین ہی امدادی سامان کی ترسیل کا مؤثر ذریعہ ہے۔

انہوں نے کہا کہ میڈیا نے بھی اپنی توجہ لال مسجد کے طرف کردی ہے اور وہ لاکھوں لوگ جو پریشان ہیں انہیں سب نے بے سہارا چھوڑ دیا ہے۔ انہوں نے بتایا کہ بارشوں کے پانی میں لوگوں کے کچے گھر اور مال مویشی جو ان کے گزر بسر کا واحد وسیلہ ہوتے ہیں بہہ جاتے ہیں۔

ایوب کھوسو نے حکمرانوں کے فضائی دوروں پر تنقید کرتے ہوئے کہا کہ بلندی سے سروے کر کے اور تصویریں اتار کر یہ کہا جاتا ہے کہ پورے بلوچستان میں خیریت ہے مگر زمینی حقائق دیکھے جائیں تو بہت تباہی ہوچکی ہے۔

ان کا کہنا تھا کہ ابھی تک اعداد و شمار کا کھیل کھیلا جارہا ہے کہ اتنے لاکھ متاثر ہوئے ہیں اتنے نہیں۔

ایوب کھوسو کا کہنا تھا کہ بارشوں کے متاثر لوگوں کو بنگلے نہیں چاہئیں، ساری زندگی انہوں نے کچے گھروں میں گزاری ہے وہ اپنے گھر نہیں چھوڑیں گے ۔ انہوں نے کہا کہ لوگوں کو کمبل نہیں چاہئیں انہیں صرف راشن پہنچایا جائے اور گھر بنانے کے لئے لکڑی اور پینے کا پانی فراہم کیا جائے۔