عبدالحئی کاکڑ بی بی سی اردوڈاٹ کام، پشاور

	پشاور میں تقریباً اس سے آٹھ گھنٹے پہلے ہونے والے دھماکہ میں دو افراد زخمی ہوئے تھے

اس دھماکے سے تقریباً آٹھ گھنٹے قبل بھی ایک بم دھماکہ ہوا تھا جس میں دو افراد زخمی ہوئے تھے۔

پشاور کےسینیئر سپرینٹنڈنٹ پولیس طاہر خان نے بی بی سی کو بتایا کہ یہ واقعہ سنیچر اور اتوار کی درمیانی شب کو ڈیڑھ بجے ہزار خانےمقام پر پیش آیا ہے۔

انہوں نے کہا کہ دو مبینہ تخریب کار بظاہر افغانستان سامان لے جانے والے کنٹینر میں بم نصب کرنے جارہے تھے کہ راستے ہی میں بم ان کے ہاتھ میں پھٹ گیا جس سے دونوں افراد موقع پر ہلاک ہوگئے۔

ہلاک ہونے والوں کی فوری طور پر کوئی شناخت نہیں ہوسکی ہے تاہم حلیہ سے وہ غیر ملکی معلوم ہو رہے ہیں۔مسٹر خان نے مزید بتایا کہ لاشیں پولیس کی تحویل میں ہیں اور ان کے ڈی این اے کے نمونے معائنے کے لیے پیر کے روز اسلام آباد بھیجے جائیں گے۔

ایس ایس پی کے مطابق بم ڈسپوزل اسکاڈ نے موقع پر پہنچ کر وہاں موجود تین ٹائم بموں کو ناکارہ بھی بنایا ہے۔

واضح رہے کہ پشاور کے رِنگ روڈ ہزار خانے کے مقام پر افغانستان سامان لے جانے والی درجنوں گاڑیاں آکر رکتی ہیں۔ یہ پہلی مرتبہ ہے کہ افغانستان سامان لے جانے والی گاڑیوں کو بظاہر بم دھماکوں کے ذریعے نشانہ بنائےجانے کی کوشش کی گئی ہے تاہم افغانستان میں تعینات اتحادی افواج کے لیے تیل کی ترسیل کرنے والی گاڑیوں میں دھماکوں کا ہونا ایک معمول بن گیا ہے جنکی ذمہ داری بعض اوقات طالبان پرعائد کی جاتی ہے۔

تاہم بعض افراد یہ الزام بھی لگاتے ہیں کہ خودگاڑی مالکان زیادہ مالی فائدہ حاصل کرنے کی خاطر تیل بیچ دیتے ہیں اور بعد میں اپنی بیمہ شدہ گاڑیوں کو بم دھماکے سے اڑا دیتے ہیں تاکہ اسےتخریب کاری کا رنگ دیا جا سکے۔گاڑی مالکان اس الزام کی تردید کرتے آئے ہیں۔

واضح رہے کہ یہ دھماکہ گزشتہ جمعہ کی شب پشاور بس ٹرمینل میں ہونے والے بم دھماکے کے تقریباً آٹھ گھنٹے بعد پیش آیا ہے جس میں دو افراد معمولی زخمی ہوگئے تھے۔