رفعت اللہ اورکزئی بی بی سی اردو ڈاٹ کام، پشاور

	صوبہ سرحد میں پشاور یونیورسٹی سمیت اعلیٰ تعلیم کے کئی ادارے ہیں

دھماکہ جمعرات کو صبح دس بجے کے قریب زرعی یونیورسٹی کے سیکرسی ڈیپارٹمینٹ کے نزدیک واقع بیت الخلاء میں اس وقت ہوا جب تمام طلباء وطالبات کلاسیں لینے میں مصروف تھے۔

دھماکے سے بیت الخلاء کے شیشے ٹوٹے اور اس کے دیواروں اور دروازوں کو بھی نقصان پہنچا۔

عینی شاہدوں کا کہنا ہے کہ دھماکہ اتنا شدید تھا کہ اس کی آوازیں دور دور تک سنائی گئی۔

یونیورسٹی کے ایک طالب علم نے نام ظاہر نہ کرنے کے شرط پر بی بی سی کو بتایا کہ دھماکے کی آواز سنتے ہی تمام طلبہ افراتفری کے عالم میں کلاسوں سے باہر نکل آئے اور یونیورسٹی کیمپس سے باہر بھاگنے لگے۔

انہوں نے بتایا کہ دھماکے کے بعد سے کیمپس میں سخت خوف وہراس کی فضا قائم ہے اور مقامی انتظامیہ نے بھی سیکیورٹی سخت کردی ہے۔

ادھر زرعی یونیورسٹی کے اسسٹینٹ پرووسٹ عبد الباسط نے کہا ہے کہ دھماکہ بم پھٹنے کے نتیجے میں نہیں ہوا بلکہ یہ ایک ’ کریکر’ تھا جو سیکریسی کے ساتھ واقع بیت الخلاء میں نصب کیا گیا تھا۔

ان کا کہنا تھا کہ دو ہفتے قبل یونیورسٹی انتظامیہ نے کیمپسں کے اندر امن وامان خراب کرنے کے پاداش میں گیارہ طلبہ کو یونیورسٹی سے خارج کیا تھا جس کے خلاف مختلف طلبہ تنظیمیں سراپا احتجاج ہیں اور اس دھماکے میں بھی متحدہ محاذ کے وہی طلباء ملوث ہو سکتے ہیں۔

انہوں نے مزید بتایا کہ ان دھماکوں کا مقصد انتظامیہ پر دباؤ ڈالنا ہے تاکہ خارج شدہ طلباء کو دبارہ بحال کیا جائے لیکن بقول ان کے انتظامیہ ان ہتکھنڈوں سے دباؤ میں آنے والی نہیں۔