عبدالحئی کاکڑ
بی بی سی اردوڈاٹ کام، پشاور |  |
| | | متاثرین نقل مکانی کرنے پر مجبور ہیں |
صوبہ سرحد کے ضلع چترال میں حکام کا کہنا ہے کہ گلیشیئر کے پگھلنے کے نتیجے میں آنے والے سیلاب کی وجہ سے سنوغر گاؤں کے تقریباً دو سو خاندانوں نے نقل مکانی کی ہے جبکہ ڈیرہ اسماعیل خان میں بھی درجنوں خاندان تاحال محصور ہیں۔ چترال کے ضلعی رابطہ آفسرکامران رحمان نے بی بی سی کو بتایا کہ گزشتہ جمعہ کی رات کو چترال سے تقریباًنوے کلومیٹر دور شمال کی جانب تحصیل مستوج کے گاؤں سنوغر کے ساتھ واقع ایک گلشیئر نے پگھلنا شروع کردیا تھا جسکی وجہ سے گاؤں مسلسل سیلابی ریلے کی زد میں ہے۔ ان کے بقول سیلاب آنے کے نتیجے میں گاؤں کے تقریباً چالیس مکانات پانی میں بہہ گئے ہیں جبکہ دو سو خاندانوں نےقریبی گاؤں میں پناہ لے رکھی ہے۔ گلیشئر کے پگھلنے کا عمل اب بھی جاری ہے۔ کامران رحمان کا مزید کہنا ہے کہ سیلاب آنے کے نتیجے میں تین پلوں کے بہہ جانے سے سنوغر گاؤں کو جانے والے تمام راستے بند ہوگئے ہیں اور کوشش کی جارہی ہے کہ وہاں تک پہنچنے کے لیے کسی ایک پل کو بحال کیا جائے۔ ان کے مطابق چالیس خاندانوں کے لیے چھ ہزار کلوگرام پر مشتمل خورد و نوش کی اشیاء متاثرہ علاقے کی طرف روانہ کر دی گئی ہیں تاہم راستوں کی بندش کی وجہ سے امدادی سامان کو پہنچانے میں مشکلات پیش آرہی ہیں۔ دوسری طرف جنوبی ضلع ڈیرہ اسماعیل خان کے ناظم حاجی عبدالرؤف نےبی بی سی کو بتایا کہ جمعہ کی رات کو دریائے گومل اور دریائے لونی میں سیلاب آنے کی وجہ سے تحصیل کلاچی کے گاؤں کوٹ ولی دادا کے لوگ چاروں طرف سے محصور ہوگئے ہیں جبکہ گرہ گل داد میں بھی مکانات کو بھار ی نقصان پہنچنے کی وجہ سے بڑی تعداد میں لوگ متاثر ہوئے ہیں۔ان کا کہنا تھا کہ دونوں گاؤں تک پہنچنے کے لیے کشتیوں کا بندوبست کیا جا رہا ہے۔ ان کے مطابق ضلعی حکومت کو اس وقت خیموں اور خورد و نوش کی اشیاء کی اشد ضرورت ہے اور اس سلسلے میں صوبائی حکومت سے فی الفور مدد کی درخواست کی گئی ہے۔ حاجی عبدالرؤف کے بقول سیلابی ریلا اب تحصیل کلاچی سے تحصیل پرووہ کی جانب بڑھ رہا ہے اور جمع شریف، شمیر اورہزارہ کے گاؤں کا سیلاب کی زد میں آنے کا امکان بڑھ گیا ہے۔ انہوں نے کہا کہ ان علاقوں کے لوگوں کو سیلاب کی پیشگی اطلاع دی گئی ہے اور اس وقت بلڈوزر کے ذریعے حفاظتی پشتے تعمیر کیے جا رہے ہیں۔ دریں اثناء قبائلی علاقے خیبر ایجنسی میں شدید بارش اور سیلاب کے آنے کی وجہ سے اڑتیس افراد کی ہلاکتوں اور سینکڑوں لوگوں کے بے گھر ہو جانے کے دو دن بعد سنیچر کے روز ہلال احمر کی جانب سے متاثرہ ایک سو بیس خاندانوں میں پہلی مرتبہ خیمے اور خوردونوش کی اشیاء تقسیم کی گئی ہیں۔لنڈی کوتل کے مقام پر پانچ پلوں کے بہہ جانے کے باعث پاکستان اور افغانستان کے درمیان بند ہونے والی مرکزی شاہراہ کو چھوٹی گاڑیوں کے لیے بحال کر دیا گیا ہے تاہم دونوں ملکوں کے درمیان چلنے والے ٹرک اب بھی بڑی تعداد میں سڑک کے کنارے کھڑے ہیں۔ محکمۂ موسمیات کے مطابق صوبہ سرحد کے بیشتر علاقوں میں تین دن سے جاری بارش تھم گئی ہے جبکہ متاثرہ علاقوں میں آئندہ چوبیس گھنٹوں کے دوران مزید بارش ہونے کی پیشگوئی کی گئی ہے۔ | 
سرحد اسمبلی کا بیس کروڑ امداد کا مطالبہ
متاثرین امداد کے منتظر
