عبدالحئی کاکڑ
بی بی سی اردوڈاٹ کام، پشاور |  |
| | | ماہرین کے مطابق سیلاب کا خطرہ ابھی برقرار ہے |
سرحد اسمبلی نے ایک قرارداد میں وفاقی حکومت سے مطالبہ کیا ہے کہ وہ صوبہ سندھ اور بلوچستان کی طرح صوبہ سرحد میں بھی بارشوں اور سیلاب سے متاثرہ علاقوں کے لیے بیس کروڑ روپے کے امدادی پیکیج کا اعلان کردے۔ صوبائی وزیر حافظ حشمت خان کی جانب سے جمہ کو پیش کی گئی قرارداد کو سرحد اسمبلی نے متفقہ طور پر منظور کر لیا۔ قرار داد میں مطالبہ کیاگیا ہے کہ صوبہ سرحد میں گزشتہ روز سے جاری بارشوں اور سیلاب کی وجہ سے مختلف علاقوں میں جانی اور مالی نقصانات ہوئے ہیں، لہذا وفاقی حکومت صوبہ سندھ اور بلوچستان کی طرح صوبہ سرحد کے لیے بھی امدادی پیکیج فراہم کردے۔ حافظ حشمت خان نے اپنی تقریر میں کہا کہ ان کے حلقہ انتخاب میں واقع ریگی للمہ، باچا گل، ملازئی اور دیگر علاقوں میں بارش اور سیلابی ریلوں کی وجہ سے تقریباً پندرہ سو افراد متاثر ہوئے ہیں۔انہوں نے وزیراعلیٰ سرحد سے ان افراد کی مدد کرنے کا مطالبہ کیا۔ ایک اور رکن اسمبلی نے خدشہ ظاہر کیا کہ چارسدہ کے قریب ادیزئی کے مقام پر ایک پل کے ٹوٹنے کا شدید خدشہ ہے اور بقول ان کے پل کے ٹوٹ جانے کی صورت میں گردو نواح کے علاقوں میں بڑی تباہی ہوسکتی ہے۔ | سیلاب کا امکان برقرار  سیلاب سے متعلق وفاقی ادارے نے اپنے ایک بیان میں پیشگوئی کی ہے کہ آئندہ چوبیس گنٹھوں کے دوران صوبہ سرحد میں دریائے کابل میں ادیزئی، گھمبیلا، ورسک، نوشہرہ، سوات، منڈا، امان درہ، خوزاخیلہ اور ناگمان کے مقام پر انتہائی درجے کے سیلاب کا امکان ہے۔  |
دوسری طرف سیلاب سے متعلق وفاقی ادارے نے اپنے ایک بیان میں پیشگوئی کی ہے کہ آئندہ چوبیس گنٹھوں کے دوران صوبہ سرحد میں دریائے کابل میں ادیزئی، گھمبیلا، ورسک، نوشہرہ، سوات، منڈا، امان درہ، خوزاخیلہ اور ناگمان کے مقام پر انتہائی درجے کے سیلاب کا امکان ہے۔ اس سلسلے میں حکومت کی جانب سے حفاظتی اقدامات کے اٹھائے جانے سے متعلق صوبائی وزیر اطلاعات آصف اقبال داؤدزئی سے رابطہ کیا گیا تو ان کا کہنا تھا کہ صوبائی حکومت نے مقامی انتظامیہ کو ہدایات جاری کی ہیں کہ وہ ہر قسم کی صورتحال سے نمٹنے کے لیے تیار رہیں۔ان کا مزید کہنا تھا کہ دریائے کابل کے کنارے پر آباد لوگوں کو پیشگی اطلاع دی گئی ہے۔ ادھر جنوبی ضلع لکی مروت سے ناظم ھمایوں سیف اللہ خان نے بی بی سی کو بتایا کہ دریائے گھمبیلا میں اونچے درجے کے سیلاب آنے کے خطرے کے پیش نظر لکی مروت جیل سے ایک سو بیس قیدیوں کو بنوں منتقل کر دیا گیا ہے۔ صوبائی ریلیف کمشنر وقار ایوب کے مطابق پشاور میں ریگی للمہ کے علاقہ میں کئی مکانات مکمل طور پر تباہ ہوئے ہیں جبکہ ایک سو کے قریب گھروں کو جزوی نقصان پہنچا ہے۔ صوبہ سرحد کے زلزلہ زدہ ضلع کوہستان میں اطلاعات کے مطابق ایک کو سٹر کے برف کے تودے تلے آنے کے نتیجے میں ایک فوجی ہلاک اور دیگر پانچ افراد زخمی ہوگئے ہیں۔تاہم سرکاری سطح پر اس واقعے کی تصدیق نہیں ہوسکی ہے۔ | 
باجوڑ: قبائل اور حکومت میں معاہدہ
